बोक्सी आरोपमा सिङ्गो परिवारलाई कुटपिट गर्ने तिनजना पक्राउ

१७ कात्तिक, जनकपुरधाम । महोत्तरीमा बोक्सीको आरोपमा सिंगो परिवार नै कुटिएको छ ।

महोत्तरीको गौशाला नगरपालिका–११ लक्ष्मीनियाका राजेन्द्र रामसहित उनका परिवारका सदस्य छिमेकबाट बोक्सी आरोपमा कुटिएका हुन् । कुटपिटबाट उनकी श्रीमती ६५ वर्षीया इतरिया देवी, छोराहरू देवेन्द्र राम र सुरेन्द्र राम, बुहारीहरू सम्तोलियादेवी, सुन्दर देवी र भान्जी कृष्णी कुमारी घाइते भएका हुन् । गत बुधबार उनीहरुमाथि कुटपिट भएको महोत्तरीका प्रहरी प्रवक्ता डीएसपी दिलीपकुमार गिरीले जानकारी दिए ।

महतो नुनियाका परिवारले सुरेन्द्रका परिवारका सदस्यमाथि कुटपिट गरेका हुन् । कुटपिटबाट इतारिया देवीको टाउको फुटेको छ भने बायाँ हात मर्केको छ । उनको जनकपुरधामस्थित सहयोग हस्पिटलमा उपचार भइरहेको छ । परिवारका अन्य सदस्यहरु समान्य घाइते भएको प्रहरीले जनाएको छ । घटनापछि कुटपिटमा संलग्न झाँक्रीसहित दुईजनालाई प्रहरीले पक्राउ गरेको छ । पक्राउ पर्नेमा सन्तोष यादव र झाँक्री विनोद पासवान छन् ।

अन्य दुईजना फरार रहेको र उनीहरुको खोजी कार्य भइरहेको डीएसपी गिरीले बताए । गिरीका अनुसार चारजनाविरुद्ध बोक्सी आरोपमा कुटपिट गरेको मुद्दामा अनुसन्धान भइरहेको छ । पक्राउ परेका दुईजनालाई हिरासतमा राख्न जिल्ला अदालतबाट अनुमति लिइसकेको जिल्ला प्रहरी कर्यालय महोत्तरीले जनाएको छ ।