सुकुनाका शिक्षकद्वारा विद्यार्थीमाथि यौन दुर्व्यवहार

४ साउन, मोरङ । 

मोरङको सुन्दरहरैँचा नगरपालिका–१०, स्थित सुकुना माध्यमिक विद्यालयका शिक्षकमाथि यौन दुर्व्यवहारको आरोप लागेको छ । विद्यालयको लेखा अधिकृतसमेत रहेका शिक्षक अविरल मास्केमाथि विद्यालयमै अध्ययनरत र पूर्वपीडित छात्राहरुले उक्त आरोप लगाएका हुन् ।  उनीहरुले सामाजिक सञ्जाल फेसबुक, इन्स्टाग्रामलगायतमा आफूहरुमाथि भएका यौनजन्य दुर्व्यवहार,अनुपयुक्त संवाद तथा मानसिक उत्पीडनको खुलासा गरेका छन् । शिक्षक मास्केले अश्लील म्यासेज पठाउने,व्यक्तिगत सम्बन्ध बनाउन दबाब दिने र जथाभावी शरीरमा छुने गरेको उनीहरुको आरोप छ ।

एक छात्राले भनेकी छन्, ‘यो सरलाई जेल हाल्नैपर्छ । मलाई यस्तो गरेको छ नि । ऊ एउटा बाटो हिँडिरहँदा,म अर्कै बाटो हिँड्थे । त्यसले मलाई त्यस्तोसम्म भनेको छ । म बयान गर्न सक्दिन,ती कुराहरु । मलाई कस्तो फिल भएको थियो त्यो बेला भनेर । त्यतिबेला मलाई डर लाग्थ्यो । स्कूलमा मेरो बदनामी हुन्छ भनेर कसैलाई भन्न सकिन ।’ अर्की छात्रा भन्छिन्, ‘कक्षा ११ मा हामी नयाँ भर्ना थियौं । त्यो सरले हामीलाई अकाउण्ट पढाउँथ्यो । मेरो साथीलाई बेबी,डार्लिङ भन्दै बाटो छेक्थ्यो । मेकअप गरेकी छस् भन्दै गाला र हात समाउन आउँथ्यो । मैले हेडसरलाई गएर भनौं भनेँ तर साथीले नमानेपछि चुप लाग्यौं ।’ विद्यालयकी एक पीडित पूर्वछात्राले भने यसबारे अन्य शिक्षकसँग गुनासो गर्दासमेत कुनै कदम नचालिएको आरोप लगाएकी छन् । ‘हामीले अफिसमै गएर भनेका थियौं । अबदेखि त्यसो गरेमा झापड हानिदिनू,स्ट्याण्ड लिनु भनियो । उहाँहरु गम्भीर नै हुनुभएन । यसले हामी निराश भयौं र बोल्नै छोड्यौं ।’

आफूहरुसँग ठोस प्रमाण नभएकोले त्यतिबेला मौन बस्न बाध्य भएको बताउँदै पीडित पूर्वछात्राहरु भन्छन्, ‘अहिले पनि त्यो सरले छात्राहरुमाथि त्यस्तो गर्ने गरेको सुनेपछि हामी बोल्न थालेका हौं । हाम्रो आवाजले अरु विद्यार्थी जोगिन्छन् भने हामी बोल्छौं ।’ कोशी प्रदेशकै उत्कृष्ट सामुदायिक विद्यालयमा गनिने सुकुनासँग जोडिएको यो घटनाले गम्भीर प्रश्न उब्जाएको छ ।  सामाजिक सञ्जालमा पीडित छात्राहरुको अडियो भाइरल हुन थालेपछि विद्यालयको आन्तरिक वातावरण,विद्यार्थीको सुरक्षामाथि प्रश्न उठिरहेको छ । यससम्बन्धमा विद्यालयको प्रतिक्रिया लिन प्रधानाध्यापक हिक्मतबहादुर बस्नेतलाई पटकपटक फोन गर्दा सम्पर्क हुन सकेन । जन आस्था