जनकपुर —मधेश प्रदेशमा कुपोषित बालबालिकाको तथ्यांक उच्च रहेको भन्दै त्यसविरुद्ध ‘इनफ’ अभियान सुरु भएको छ । तीन वर्षलाई लक्षित गरेर थालिएको कुपोषणविरुद्धको ‘इनफ’ अभियानले बालबालिकालाई पोषिलो खानेकुरामा पहुँच पुर्‍याउने दाबी गरिएको छ ।

वर्ल्ड भिजन नेपालले शुक्रबार जनकपुरमा आयोजना गरेको कुपोषणमुक्त मधेश प्रदेशको लागि ‘इनफ’ अभियानको मुख्यमन्त्री सतिशकुमार सिंहले शुभारम्भ गरे । मुख्यमन्त्री सिंहले एक नवजात शिशुलाई पोषिलो खानेकुरा चम्चाले खुवाउँदै अभियानको शुभारम्भ गरेका थिए ।

उनले मधेश प्रदेशमा अन्नको पर्याप्त र विविधता रहेपनि बालबालिकाको कुपोषण देखिनु चिन्ताजनक रहेको बताए । ‘बालबालिकालाई पोषिलो खानेकुरा खुवाउन हामी कहाँ चुक्यौँ ? यो चिन्ताको विषय हो,’ मुख्यमन्त्री सिंहले भने,‘कुन बेला के खाने, कति खाने र कसरी खाने यो बुझ्नु पनि जरुरी छ ।’ सिंहले मधेश प्रदेशलाई कुपोषणमुक्त बनाउन प्रदेश सरकारले हरेक किसिमको सहयोग गर्न तयार रहेको पनि बताए ।