एमाले सर्लाहीको नवौं अधिवेशनको नारा र लोगो सार्वजनिक

सर्लाही।
नेकपा एमाले सर्लाहीले नवौं जिल्ला अधिवेशनको लोगो र नारा सार्वजनिक गरेको छ‌। लोगोमा देशको राष्ट्रिय झन्डालाई उच्च प्राथमिकतामा राखेर जिल्लाको मुख्य आकर्षण र महत्वपुर्ण प्राकृतिक ताल नाडिमन तालको पुनः उत्थान गरिनुपर्ने सन्देश दिदै मधेशको शिर मानिने जिल्लाको उत्तरी क्षेत्रको चुरे क्षेत्रको संरक्षण, जिल्लाको मुख्य उत्पादन उखु र टमाटरको महत्व लोगोमा झल्काइएको लोगो तथा नारा उपसमितिका संयोजक चूडामणि वाग्लेले जानकारी दिए।

त्यसैगरी अधिवेशनको मुख्य नारा “जवजको मुल मार्ग: संवृद्धिको यात्रा, सीमादेखि चुरेसम्म एमालेको झण्डा!” रहेको छ। यस नाराले जनताको बहुदलिय जनवादको मुख्य वाटोमा सर्लाहीको सवृद्धि, विकास र हित प्रवर्द्धन भएको र नेकपा एमालेको प्रभाव सीमा क्षेत्र देखि उत्तरी चुरेसम्म उस्तै उर्वर रहेको सन्देश दिएको छ।

नवौं जिल्ला अधिवेशनको उद्घाटन समारोह वैशाख ३० गते विहान ११ बजे सदरमुकाम मलंगवा स्थित विश्वकर्मा चौकमा रहेको गोखुल राम साहको वगैचामा हुने र सो अधिवेशनलाई नेकपा एमाले अध्यक्ष केपी शर्मा ओलीले सम्बोधन गर्नुहुने नेकपा एमाले सर्लाहीले जनाएको छ।