७ माघ, सर्लाही। सर्लाहीको  सदरमुकाम मलंगवामा पुनर्निमाण गरिएको सर्लाही कारागार भवनको आईतबार बिहान उपप्रधान तथा गृहमन्त्री नारायणकाजी श्रेष्ठले उद्घाटन गरेका छन् ।

शिलालेख अनावरण, रिवन काटेर तथा पानसमा दिप प्रज्वलन् मार्फत प्रमुख अतिथि उपप्रधान एवं गृहमन्त्री श्रेष्ठले कारागार भवनको उद्घाटन गरेका हुन् । लामो समयदेखि जीर्ण रहेको कारागारमा कैदी बन्दी बस्न नसक्ने वातावरण नभएपछि सर्लाही कारागारबाट कैदी बन्दीलाई अन्यत्र स्थानान्तरण गरिएको थियो। कारगारभित्रका कैदीलाई सर्लाही प्रशासनले सिन्धुली, महोत्तरी, झुमका र रौतहट कारागारमा स्थानान्तरण गरी कारागार भवण निर्माण सुरु गरिएको थियो। सहरी बिकास डिभिजन कार्यालय जनकपुरले कारागार निर्माण गर्न राम जानकी निर्माण सेवालाई चार करोडमा ठेक्का दिएको थियो। लामो समयपछि सञ्चालनमा आएको कारागारमा रौतहट जिल्ला कारागारबाट ३० जना कैदीबन्दी सारेर सर्लाही कारागारमा ल्याएको कारागारका महानिर्देशक काशिराज दाहालले बताए।