२७ कात्तिक, जनकपुरधाम ।

मधेश प्रदेशमा मुख्यमन्त्री नियुक्तिको विवाद चर्कँदै जाँदा आन्दोलनरत ७ राजनीतिक दलहरूले सर्वोच्चको फैसला नआएसम्म आन्दोलन जारी राख्ने घोषणा गरेका छन्। नेकपा (एमाले) संसदीय दलका नेता सरोजकुमार यादवलाई अवैधानिक तरिकाले मुख्यमन्त्रीमा नियुक्त गरिएको विरोधमा बुधबार चौथो दिन पनि ७ दलले संयुक्त रूपमा प्रदर्शन गरेका छन्। जसपा नेपाल मधेशका प्रमुख सचेतक रामअशिष यादवले प्रदेशमा संवैधानिक व्यवस्थाको उल्लंघन गरी अवैधानिक ढंगले मुख्यमन्त्री नियुक्ति गरिएको आरोप लगाए। उनले भने, “संविधानको धारा १६८(२) बमोजिम नै सरकार गठनको बाटो स्पष्ट छ, तर त्यसको बेवास्ता गरेर बदनियतपूर्वक सत्ता कब्जा गरिएको हो।”

उनका अनुसार, सर्वोच्च अदालतको फैसला नआएसम्म आन्दोलन शान्तिपूर्ण ढंगले निरन्तर गरिनेछ। आन्दोलनमा सहभागी दलहरूमा नेपाली कांग्रेस, जनता समाजवादी पार्टी (जसपा) नेपाल, लोकान्त्रिक समाजवादी पार्टी (लोसपा), नेकपा (एकीकृत समाजवादी), नेपाली कम्युनिष्ट पार्टी, नागरिक उन्मुक्ति पार्टी लगायत रहेका छन्। यसअघि मंगलबार मुख्यमन्त्री सरोजकुमार यादवले पदभार ग्रहण गर्दै गर्दा पनि मधेश भवन बाहिर आन्दोलनरत दलका नेता तथा कार्यकर्ताहरूले विरोध प्रदर्शन गरेका थिए। आन्दोलनकारी दलहरूले प्रदेश प्रमुखको कदमलाई संविधान, लोकतन्त्र र संघीयताको मर्मविपरीत भन्दै मुख्यमन्त्रीको नियुक्ति खारेज गर्न सर्वोच्च अदालतमा रिट दर्ता गरेका छन्।