झापा । झापाको बिर्तामोड नगरपालिका–५ मा गएराति भएको कुटपिट घटनामा एक युवकको ज्यान गएको छ । मृतक सोही ठाउँका ३० वर्षीय जगन राजवंशी रहेका छन् ।

इलाका प्रहरी कार्यालय बिर्तामोडका अनुसार बुधवार साँझ करिब साढे ६ बजे विवादका क्रममा २६ वर्षीय हेमकुमार चौधरीले बाँसको टुक्राले राजवंशीको टाउकोमा प्रहार गरेका थिए । सो प्रहारबाट गम्भीर घाइते भएका राजवंशीलाई उपचारका लागि बिएण्डसी अस्पताल बिर्तामोड लगिएको थियो । तर, उपचारकै क्रममा उहाँको मृत्यु भएको प्रहरीले जनाएको छ ।

घटनापछि फरार रहेका चौधरीलाई प्रहरीले बिहीवार बिहान करिब २ः१५ बजे झापा शिवसताक्षी नगरपालिका–७ ब्याङडाँडाबाट लुकेको अवस्थामा पक्राउ गरेको हो ।

हाल उनलाई थप अनुसन्धानका लागि इलाका प्रहरी कार्यालय बिर्तामोडमा राखिएको प्रहरीले जानकारी दिएको छ ।