राप्रपाले रुपन्देही–३ को उम्मेदवार प्रारम्भिक निर्वाचनबाट छनोट गर्ने
सारांश
- राष्ट्रिय प्रजातन्त्र पार्टी (राप्रपा)ले पनि रुपन्देहीमा आन्तरिक चुनावमार्फत् उम्मेदवार छनोट गर्ने भएको छ ।
- रुपन्देही निर्वाचन क्षेत्र नम्बर ३ मा आगामी कार्तिक १७ गते हुने उपनिर्वाचनका लागि राप्रपाले आन्तरिक चुनावमार्फत् उम्मेदवार टुंग्याउने भएको हो ।
- मंगलबार बसेको राप्रपा संसदीय दलको बैठकले राप्रपा नवीन कार्ययोजनाको मोडल अनुसार उम्मेदवार चयनका लागि निर्वाचन गर्ने निर्णय गरेको प्रवक्ता एवं प्रचार विभाग प्रमुख मोहन कुमार श्रेष्ठले जानकारी दिए ।
१७ भदौ, काठमाडौँ ।
राष्ट्रिय प्रजातन्त्र पार्टी (राप्रपा)ले पनि रुपन्देहीमा आन्तरिक चुनावमार्फत् उम्मेदवार छनोट गर्ने भएको छ । रुपन्देही निर्वाचन क्षेत्र नम्बर ३ मा आगामी कार्तिक १७ गते हुने उपनिर्वाचनका लागि राप्रपाले आन्तरिक चुनावमार्फत् उम्मेदवार टुंग्याउने भएको हो । मंगलबार बसेको राप्रपा संसदीय दलको बैठकले राप्रपा नवीन कार्ययोजनाको मोडल अनुसार उम्मेदवार चयनका लागि निर्वाचन गर्ने निर्णय गरेको प्रवक्ता एवं प्रचार विभाग प्रमुख मोहन कुमार श्रेष्ठले जानकारी दिए ।
उपनिर्वाचनका लागि उमेदवार छनोट गर्न रूपन्देही जिल्ला कार्यसमितिबाट सिफारिश भइआएका आकांक्षी उमेदवारमध्येबाट प्रजातान्त्रिक ढंगबाट उमेदवार छनोट गर्न आन्तरिक प्रारम्भिक निर्वाचन गराउने निर्णय भएको उनले जनाए । आन्तरिक प्रारम्भिक निर्वाचन यथाशिघ्र गरिने र त्यसको आवश्यक प्रबन्ध रुपन्देही उपनिर्वाचन परिचालन समितिले गर्ने निर्णय भएको छ । जसअनुसार रुपन्देही-३ को प्रतिनिधिसभा क्षेत्रीय कार्यसमितिका पदाधिकारी तथा सदस्यहरू, रुपन्देही-३ अन्तर्गतका प्रदेशसभा (क) र (ख) कार्यसमितिका पदाधिकारी तथा सदस्यहरू मतदाता हुनेछन् ।
यसैगरी, रुपन्देही-३ अन्तर्गतका सबै उपमहानगर, नगर, गाउँपालिका र वडा कार्यसमितिका पदाधिकारी तथा सदस्यहरू, रुपन्देही-३ बाट प्रतिनिधित्व गर्ने प्रदेश कार्यसमितिका पदाधिकारी तथा सदस्यहरू, रुपन्देही-३ बाट प्रतिनिधित्व गर्ने जिल्ला कार्यसमितिका पदाधिकारी तथा सदस्यहरू, रुपन्देही-३ बाट प्रतिनिधित्व गर्ने केन्द्रीय सदस्य तथा पदाधिकारीहरू पनि मतदाता रहने प्रवक्ता श्रेष्ठले बताए ।
यस्तै, आज मंगलबार (२०८२ भदौ १७ गते)सम्म कायम रहेका रुपन्देही-३ भित्रका केन्द्रदेखि जिल्ला तहसम्मका भातृ संगठनका पदाधिकारी तथा सदस्यहरू र यही मितिसम्म सक्रिय सदस्य भइसकेका रुपन्देही-३ अन्तर्गतका सक्रिय सदस्यहरू मतदाता रहने उनले बताए ।
यसअघि राष्ट्रिय स्वतन्त्र पार्टी (रास्वपा)ले पनि आन्तरिक निर्वाचनमार्फत् उम्मेदवार चयन गरेको छ । रास्वपाले लेखजंग थापालाई उम्मेदवार चयन गरेको छ । तर, उनले बहुविवाह गरेको भनेर अहिले आलोचना भइरहेको छ ।
प्रतिक्रिया