अर्थमन्त्री र गभर्नरबिच दरारको खोजी गर्नेहरू निराश हुनेछन्: अर्थमन्त्री पौडेल

काठमाडौँ, २७ जेठ : उपप्रधानमन्त्री एवं अर्थमन्त्री विष्णुप्रसाद पौडेलले वित्त नीति र मौद्रिक नीतिका बीचमा दरारको खोजी गर्नेहरू आउने दिनमा निराश हुने बताएका छन् । काठमाडौँमा आयोजित एक कार्यक्रममा उनले मौद्रिक नीति र वित्त नीतिबिचको आपसी सन्तुलन, अर्थ मन्त्रालय र राष्ट्र बैंकका बिचको आपसी सम्बन्ध, अर्थमन्त्री र गभर्नरबिचको सम्बन्धको विषय केही समयदेखि छलफल र चर्चाको विषय बन्ने गरेको उल्लेख गर्दै यस्तो देख्दा दुःख लाग्ने बताए ।

उनले अर्थ मन्त्रालय र राष्ट्र बैंकका बिचमा, अर्थमन्त्री र गभर्नरका बीचमा कुनै असमझदारीको परिकल्पना राज्य प्रणालीले नगरेको जिकिर गरे । यी दुई संस्था र पदाधिकारीका बिचमा जीवन्त र घनिष्ठ सम्बन्धको अपेक्षा गरिएको उनले उल्लेख गरे । उचित संयोजन र सन्तुलन कायम हुन सके, पारस्परिक सम्बन्ध हार्दिक हुन सके र एकले अर्काका विषयहरू सुन्ने, बुझ्ने र सघाउने उद्देश्यका साथ अघि बढ्न सके समग्र अर्थतन्त्रलाई अघि बढाउन मद्दत पुग्ने विश्वास व्यक्त गरे । यी दुई संस्था र दुई निकायका बीचमा मौद्रिक नीति, वित्त नीतिका बीचमा सही सन्तुलन हुन सकेनन् भने त्यसले अर्थतन्त्रको गतिलाई नकारात्मक प्रभाव पर्ने बताए ।

मौद्रिक नीति र वित्त नीतिमध्ये एउटाले रोक्ने र अर्कोले खोल्ने बाटोबाट हिँड्ने नभई यी दुईका बीचमा सन्तुलन कायम गर्दै अघि बढ्ने प्रतिबद्धता जनाए । आफ्ना सीमाभित्र रहेर समस्या केन्द्रित र समाधान उन्मुख सार्थक प्रयासमा सँगै अगाडि बढ्ने र मुलुकको अर्थतन्त्र गतिशील बनाउन प्रयास गर्ने उनले बताए ।  मौद्रिक सुशासनको बारेमा केही प्रश्नहरू उठ्ने गरेको बताउँदै अर्थमन्त्री पौडेलले सुशासनका प्रश्नमा कतै न कतै चुक्ने गरेको जिकिर गरे । उनले सुशासन प्रभावकारी बनाउन कहाँ ध्यान दिनुपर्छ भन्ने विषयमा बुझेर समस्या समाधान गर्न आवश्यक रहेको पनि बताए ।