बर्षायाममा मेलम्ची खानेपानी बन्द हुँदैन : मन्त्री यादव
९ वैशाख, काठमाडौं–
खानेपानीमन्त्री प्रदीप यादवले यस वर्षको बर्षायाममा मेलम्ची खानेपानी बन्द नहुने बताएका छन् । सिंहदरबारमा मंगलबार बसेको राष्ट्रियसभा अन्तर्गतको विकास, आर्थिक मामिला तथा सुशासन समिति बैठकमा मन्त्री यादवले यस वर्ष असारमा पनि मेलम्ची खानेपानी बन्द नहुने बताएका हुन् । बर्षायाममा मेलम्ची खोलाबाट नभई नजिकैको अर्को खोलाबाट पानी ल्याइने उनले बताए ।
त्यस्तै उनले शिवपुरी लगायतका स्रोतबाट व्यवस्थापन गरेर भए पनि उपत्यकावासीलाई खानेपानीको कमी हुन नदिने दाबी गरे । मन्त्री यादवले बबरमहलमा खानेपानीको पाइप फुटेको विषयमा छानबिन समिति बनाइएको भन्दै पाइपको गुणस्तर जाँच्ने प्रविधि नेपालमा नहुँदा समस्या भएको बताए । पाइपको गुणस्तरको जाँचका लागि भारत पठाउँदा सीमामा नै रोकिएको उनले गुनासो गरे ।मन्त्री यादवले खानेपानीमा तीनै तहको सरकार मिलेर शत प्रतिशत लगानी राज्यले गर्ने उल्लेख गरे । उनले देशका सबै स्थानका नागरिकलाई स्वच्छ खानेपानी पुराउने मन्त्रालयको लक्ष्य भए पनि बजेटका कारण केही समस्या आएको बताए ।
Post Comment