१२ असोज ,हेटौंडा।‌ लगातारको वर्षाले कुलेखानी जलाशय भरिएपछि शनिबार बिहान ५:४० बजे ड्यामको ढोका खोलिएको छ। यो ३१ वर्षपछि पहिलो पटक जलाशय भरिएर ढोका खोलिएको हो। यसअघि २०५० सालमा ढोका खोलिएको थियो। जलाशयको भण्डारण क्षमता १५३० मिटर भए पनि यसपटक ३५ सेन्टिमिटर बढी पानी भरिएको थियो। नेपाल विद्युत् प्राधिकरणको व्याकअपको रूपमा रहेको कुलेखानी जलाशय भरिएपछि ढोका खोल्ने निर्णय गरिएको हो। कुलेखानी प्रथमका प्रमुख तारादत्त भट्टले जलाधार क्षेत्रमा निरन्तर पानी परिरहेकाले ड्यामको ढोका खोल्नुपरेको जानकारी दिए। हाल प्रतिसेकेन्ड ३ सय क्युसेक पानी फालिँदैछ। गत वर्ष जलाशय पूर्ण रूपमा भरिएको थिएन, तर यस वर्ष यो क्षमता भन्दा बढी भरिएको छ। पानीको उच्च मात्रा खपत गर्न कुलेखानीका तीन वटै विद्युत् गृह सञ्चालनमा आएका छन्। कुलेखानी जलविद्युत् आयोजनाबाट १०६ मेगावाट विद्युत् उत्पादन भइरहेको छ। ड्यामको ढोका खोलिएपछि तल्लो तटीय क्षेत्रहरूमा एक्कासी बाढी आउन सक्ने सम्भावनालाई मध्यनजर गर्दै मकवानपुर प्रशासनले शुक्रवार बेलुका नै सूचना जारी गरेको थियो। सिस्नेरीदेखि वाग्मती नदी किनाराका बासिन्दालाई सतर्क रहन आग्रह गरिएको छ। जलाशयको सुरक्षालाई ध्यानमा राख्दै, ढोका खोलेर जलाशयको सतह नियन्त्रणमा राखिएको अधिकारीहरूले बताएका छन्।