स्वास्थ्य सेवा विभागका तत्कालीन प्रशासक सापकोटाविरुद्ध भ्रष्टाचार मुद्दा, २ करोड बिगो

स्वास्थ्य सेवा विभागका तत्कालीन वरिष्ठ स्वास्थ्य प्रशासक (दशौं तह) डा. अर्जुन प्रसाद सापकोटाविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले शुक्रबार डा. सापकोटा र उनकी पत्नीलाई समेत प्रतिवादी बनाउँदै विशेष अदालतमा मुद्दा दायर गरेको हो।

सापकोटाले स्वास्थ्य मन्त्रालय अन्तर्गतका विभिन्न कार्यालयमा कार्यरत रहँदा गैरकानुनी रुपमा आयआर्जन गरेको उजुरी अख्तियारमा परेको थियो। अनुसन्धानको क्रममा उनको सेवा अवधिमा वैध आम्दानीभन्दा दुई करोड तीन लाख ९४ हजार ६१५ रूपैयाँ बढी फेला परेको अख्तियारको दाबी छ। अख्तियारले बढी देखिएको सम्पत्ति बराबर बिगो कायम गर्दै मुद्दा दायर गरेको हो।

सापकोटाको सुरू नियुक्ति २०५३ साउन २५ गतेदेखि २०८० वैशाख ३० गतेसम्मको अवधिको आय–व्यायमा अनुसन्धान गरेको थियो।

जुन अवधिमा तीन करोड ३५ लाख ७७ हजार २६० रुपैयाँ वैध आम्दानी देखिएको छ। तर यही अवधिमा उनको खर्च पाँच करोड ३९ लाख ७१ हजार ८७५ रुपैयाँ देखिएको अख्तियारको दाबी छ।

बढी देखिएको खर्चको आम्दानी उनले पुष्टि गर्न नसकेपछि भ्रष्टाचारको आरोपमा मुद्दा दायर गरिएको हो। उनीहरु दुवैको नाममा रहेको सम्पत्ति समेत जफत गर्न अख्तियारको माग छ।