सर्लाहीमा आयुर्वेद स्वास्थ्यकर्मी समाजको नयाँ नेतृत्व चयन

२९ साउन, सर्लाही।

नेपाल आयुर्वेद स्वास्थ्यकर्मी समाज सर्लाहीको अध्यक्षमा चूनचूनप्रसाद यादव सर्वसम्मत चयन भएका छन्।

सदरमुकाम मलंगवामा बिहीबार सम्पन्न समाजको ७ औँ जिल्ला अधिवेशनले यादवको अध्यक्षतामा ९ सदस्यीय नयाँ कार्यसमिति चयन गरेको हो। नवनिर्वाचित कार्यसमितिको सचिवमा बालकेश्वर पण्डित, कोषाध्यक्षमा गीताकुमारी यादव तथा सदस्यहरूमा श्यामसुन्दर ठाकुर, रामविश्वास राय, अरुणकुमार यादव, ममता कुमारी, शशिनाथ मिश्र र अर्चना कुमारी चयन भएका छन्।

अधिवेशन समाजका निवर्तमान अध्यक्ष रामनरेश यादवको अध्यक्षतामा सम्पन्न भएको थियो। कार्यक्रममा प्रदेश अध्यक्ष रामछविला यादव प्रमुख अतिथि तथा डा. सुरेन्द्र राय विशिष्ट अतिथिका रूपमा सहभागी थिए। नवनिर्वाचित अध्यक्ष चूनचूनप्रसाद यादवले जारी गरेको प्रेस विज्ञप्तिअनुसार नेपाल आयुर्वेद स्वास्थ्यकर्मी समाजले आयुर्वेद स्वास्थ्यकर्मीहरूको हकहित तथा आयुर्वेद सेवाको विकास र प्रवर्द्धनका लागि विशुद्ध रूपमा काम गर्ने जनाएको छ।