सर्लाहीका चार क्षेत्रमा १३३ जनाको उम्मेदवारी
सारांश
- आगामी फागुन २१ गते हुने प्रतिनिधिसभा सदस्य निर्वाचनका लागि सर्लाही जिल्लाका चारवटै निर्वाचन क्षेत्रमा गरी कुल १३३ जनाले उम्मेदवारी दर्ता गराएका छन्।
- मङ्गलबार सम्बन्धित निर्वाचन अधिकृतको कार्यालयमा पुगेर विभिन्न राजनीतिक दलका ६१ र स्वतन्त्र ७२ जनाले मनोनयन पत्र दर्ता गराएका हुन्।
- जिल्ला निर्वाचन कार्यालयका नायब सुब्बा मनिष कुमार साहका अनुसार निर्वाचन क्षेत्र नं.
७ माघ, सर्लाही ।
आगामी फागुन २१ गते हुने प्रतिनिधिसभा सदस्य निर्वाचनका लागि सर्लाही जिल्लाका चारवटै निर्वाचन क्षेत्रमा गरी कुल १३३ जनाले उम्मेदवारी दर्ता गराएका छन्। मङ्गलबार सम्बन्धित निर्वाचन अधिकृतको कार्यालयमा पुगेर विभिन्न राजनीतिक दलका ६१ र स्वतन्त्र ७२ जनाले मनोनयन पत्र दर्ता गराएका हुन्। जिल्ला निर्वाचन कार्यालयका नायब सुब्बा मनिष कुमार साहका अनुसार निर्वाचन क्षेत्र नं. १ मा १० स्वतन्त्रसहित २९, क्षेत्र नं. २ मा १७ स्वतन्त्रसहित ३१, क्षेत्र नं. ३ मा १९ स्वतन्त्रसहित ३४ र क्षेत्र नं. ४ मा २६ स्वतन्त्रसहित ३९ जनाले उम्मेदवारी दिएका छन्। चारै क्षेत्रमा स्वतन्त्र उम्मेदवारको उल्लेख्य उपस्थिति देखिएको छ।
निर्वाचन क्षेत्र नं. १ मा राष्ट्रिय स्वतन्त्र पार्टी (रास्वपा)बाट नितिमा भण्डारी, नेपाल कम्युनिष्ट पार्टीबाट प्रमोद साह, जसपा नेपालबाट रामप्रकाश चौधरी र राष्ट्रिय मुक्ति पार्टीबाट विकास ठाकुरलगायतले मनोनयन दर्ता गराएका छन्। क्षेत्र नं. २ मा राष्ट्रिय मुक्ति पार्टीका अध्यक्ष राजेन्द्र महतो, नेपाल कम्युनिष्ट पार्टीबाट महेन्द्र राय यादव तथा नेपाली कांग्रेसबाट डा. सरोज कुमार प्रमुख उम्मेदवारका रूपमा उम्मेदवारी दर्ता गरेका छन्। क्षेत्र नं. ३ मा राष्ट्रिय स्वतन्त्र पार्टीबाट नरेन्द्र साह कलवार, नेपाल कम्युनिष्ट पार्टीबाट नारायणकाजी श्रेष्ठ, नेपाली कांग्रेसबाट विनोद कुमार ढकाल र नेकपा एमालेबाट हरि प्रसाद उप्रेती निर्वाचन मैदानमा उत्रिएका छन्। यसैगरी क्षेत्र नं. ४ मा नेपाली कांग्रेसबाट गगन कुमार थापा, राष्ट्रिय स्वतन्त्र पार्टीबाट अमरेश कुमार सिंह र जसपा नेपालबाट रामेश्वर राय यादवलगायतले उम्मेदवारी दर्ता गराएका जिल्ला निर्वाचन कार्यालयले जनाएको छ।
प्रतिक्रिया