अनुमतिबिनै कैलालीको जंगलमा बसेका १६ देशका नागरिकलाई हटाउँदै प्रहरी
सारांश
- कैलालीको सिमली जंगलमा बस्दै आएका १६ देशका नागरिकहरूलाई त्यहाँबाट हटाउन प्रहरी परिचालन गरिएको छ।
- घोडाघोडी नगरपालिका–९ स्थित सिमली जंगलमा तीन सातादेखि उनीहरू बस्दै आएका थिए।
- स्थानीय प्रशासनले उनीहरूलाई उक्त ठाउँ छाड्न यसअघि नै निर्देशन दिएको थियो।
११ चैत काठमाडौँ ।
कैलालीको सिमली जंगलमा बस्दै आएका १६ देशका नागरिकहरूलाई त्यहाँबाट हटाउन प्रहरी परिचालन गरिएको छ। घोडाघोडी नगरपालिका–९ स्थित सिमली जंगलमा तीन सातादेखि उनीहरू बस्दै आएका थिए। स्थानीय प्रशासनले उनीहरूलाई उक्त ठाउँ छाड्न यसअघि नै निर्देशन दिएको थियो। तर बाटोखर्च नभएकाजस्ता विभिन्न समस्या देखाएर उनीहरू जंगलमै बसिरहेका थिए।
यी विदेशी नागरिकहरूमध्ये केही सोमबार उक्त ठाउँ छाडेर अन्यत्र गएका छन्। कैलालीका प्रमुख जिल्ला अधिकारी गोगनबहादुर हमालले एक सय ५० जनाभन्दा बढी विदेशी नागरिकहरू सिमली जंगल बिनाअनुमति बस्दै आएकोमा हटाउन थालिएको बताए। ‘विदेशी नागरिकहरू केही दिनयता सिमली जंगल छाडिरहेका छन्। सोमबार १६ जनाले जंगल छाडेर गन्तव्यतर्फ लागेका छन्,’ उनले भने।
अमेरिका, भारत, चीन लगाएत विभिन्न देशका मानिसहरू जंगलमा बस्दै आएको सूचना पाएपछि स्थानीय प्रशासनले जंगलमै पुगेर सोधपुछ गरेको थियो। गत बुधबार प्रमुख जिल्ला अधिकारी हमाल पनि जंगलमा पुगेर उनीहरूलाई भेटेका थिए। साथै २४ घन्टाभित्र जंगल छाड्न निर्देशन दिएका थिए।
प्रतिक्रिया