पोखरा महानगरपालिकाका प्रमुख मेयर धनराज आचार्य १२ दिनपछि डिस्चार्ज

१५ फागुन,  पोखरा महानगरपालिकाका प्रमुख धनराज आचार्यले १२ दिनको अस्पताल बसाइपछि नियमित काममा फर्कने घोषणा गरेका छन् । गत हप्ता ‘पोखरा भ्रमण वर्ष २०२५’को औपचारिक घोषणा समारोहका क्रममा भएको प्राविधिक त्रुटिका कारण उपप्रधानमन्त्री र अर्थमन्त्री माननीय विष्णु पौडेलसँगै आचार्यलाई जलनको समस्या भएको थियो। त्यसपछि उनीलाई किर्तिपुर अस्पताल, काठमाडौंमा भर्ना गरिएको थियो ।

आचार्यले बिहीबार एक सार्वजनिक सन्देशमार्फत आफ्नो स्वास्थ्यलाभको जानकारी दिएका छन् । उनले उपचारमा संलग्न चिकित्सक, स्वास्थ्यकर्मी र अस्पतालका परिवारलाई आभार व्यक्त गरे । साथै, उनले उपप्रधानमन्त्री विष्णु पौडेल, राष्ट्रपति रामचन्द्र पौडेल, प्रधानमन्त्री केपी शर्मा ओली लगायतका विभिन्न प्रमुख नेताहरूसँगै समस्त कूटनीतिक नियोग र आम पोखरेलीलाई धन्यवाद ज्ञापन गरेका छन् ।आचार्यले भनेका छन्, ‘यस कठिन समयमा तपाईंहरूले प्रदान गर्नुभएको सद्भाव, मायालु सन्देश, र मनोबल अत्यन्त प्रेरणादायी रहेका छन् ।

अब म पोखरा फर्केर काममा जुट्नका लागि तयार छु र तपाईंहरूको सहयोग र सुझावको अपेक्षामा छु ।’ स्वास्थ्य सन्दर्भमा, आचार्यले विशेष सावधानी अपनाउनुपर्ने उल्लेख गरेका छन् । उनलाई कम्तिमा ६ महिना घामको प्रत्यक्ष सम्पर्कमा नजाने, भिडभाडमा नजाने र स्वास्थ्य प्रोटोकल कडाईका साथ पालना गर्नुपर्नेछ । ‘हात नमिलाउने, नियमित स्वास्थ परीक्षण गराउने र डाक्टरको सल्लाह लिनुपर्नेछ,’ उनले उल्लेख गरेका छन् ।