लुम्बिनी सरकारले शुरू गर्‍यो सशस्त्र द्वन्दका घाइते र अपाङ्गता भएकाहरूको उपचार

२३ माघ, बुटवल। लुम्बिनी प्रदेश सरकारले सशस्त्र द्वन्दका घाइते तथा अपाङ्गता भएका व्यक्तिहरूको उपचार शुरू गरेको छ ।

उपचारका लागि लुम्बिनी प्रादेशिक अस्पताल, बुटवलसँग समन्वय भएको प्रदेश गृह मन्त्रालयका शाखा अधिकृत मेघराज सोनीले जानकारी दिए । सशस्त्र द्वन्दका क्रममा घाइते तथा अपाङ्गता भएकाहरूको उपचारसम्बन्धी कार्यविधि २०८० तयार गरी उपचारको प्रक्रिया अघि बढाइएको उनको भनाइ छ । ‘घाइते तथा अपाङ्गता भएका व्यक्तिहरूले नेपाली नागरिकताको प्रमाणित प्रतिलिपि, दुई प्रति तस्वीर, जिल्ला प्रशासन कार्यालयको सिफारिश ल्याएमा उपचार गर्न पाइन्छ,’ उनले भने ।  घाइते तथा अपाङ्गता भएका व्यक्तिको उपचारका लागि लुम्बिनी प्रदेश सरकारले चालु आर्थिक वर्ष २०८०-८१ का लागि ५० लाख रुपैयाँ बजेट विनियोजन गरेको थियो । लुम्बिनीका अर्थमन्त्री धनबहादुर मास्कीले विभिन्न आन्दोलनमा घाइते भएकाहरू आर्थिक अवस्था कमजोर भएकै कारण उपचारबाट बञ्चित हुनु परेको सुनासो आएकाले त्यसलाई मध्येनजर गरी कार्यक्रम शुरू गरिएको बताए ।

‘परिवर्तनका लागि भएको जनयुद्ध तथा विभिन्न आन्दोलनमा घाइते भएकाहरू आर्थिक अवस्था कमजोर भएकै कारण उपचारबाट बञ्चित हुनु परेको सुनासो छ,’ उनले भने, ‘त्यसलाई मध्येनजर गरी कार्यक्रम शुरू गरिएको हो ।’ २०५२ सालदेखि तत्कालीन नेकपा (माओवादी)ले सशस्त्र युद्ध शुरू गरेको थियो । १० वर्षसम्म चलेको उक्त युद्धमा कम्तीमा १७ हजार नागरिकले ज्यान गुमाएका थिए । यसक्रममा घाइते भएर अपाङ्गता भएकाहरूको संख्या पनि उत्तिकै छ । अहिले सोही युद्धका कमाण्डर पुष्पकमल दाहाल प्रचण्ड देशको प्रधानमन्त्री छन् ।