सर्लाहीमा अनुदानको मल कालोबजारी गर्ने तीन जना पक्राउ

२० साउन, सर्लाही।

अनुदानमा उपलब्ध हुने रासायनिक मल कालोबजारी गरेको आरोपमा सर्लाही प्रहरीले तीन जनालाई पक्राउ गरेको छ। जिल्ला प्रहरी कार्यालय सर्लाहीका अनुसार मलङ्गवा नगरपालिका–१० स्थित कृष्ण जेनरल स्टोरबाट डीएपी मल बिक्री गरिरहेको अवस्थामा मलङ्गवा–७ गणेशियाका अभिनय राय र अभिनन्दन रायलाई नियन्त्रणमा लिइएको हो।

प्रहरीले उनीहरूसँग सोधपुछ गर्दा अनुमति बिना डीएपी मल प्रतिवोरा ३ हजार ५ सय रुपैयाँमा बिक्री गरिरहेको खुलेको जनाएको छ। पसलमा गरिएको खानतलासीका क्रममा ५० किलो तौलका चार बोरा डीएपी र एक बोरा युरिया मल बरामद भएको प्रहरीले जनाएको छ। प्रहरीका अनुसार पक्राउ परेका दुवैले उक्त मल मलङ्गवा–४ शिवसागर चोकस्थित एक पसलबाट प्रतिवोरा ३ हजार २ सय रुपैयाँमा खरिद गरी बिक्री गरिरहेको बयान दिएका थिए।

त्यसपछि प्रहरीले शिवसागर चोकस्थित पसलका सञ्चालक मलङ्गवा–३ का राहुल गुप्तालाई पनि पक्राउ गरेको छ। गुप्ताको पसलबाट सात बोरा युरिया मल बरामद गरिएको प्रहरीले जनाएको छ। प्रहरीले तीनै जनाविरुद्ध कालोबजारीसम्बन्धी कसुरमा जिल्ला प्रशासन कार्यालय सर्लाहीबाट सात दिनको म्याद थप गरी अनुसन्धान अघि बढाएको जनाएको छ।