खैरो हेरोइनसहित एक जना पक्राउ

धनकुटा — धनकुटामा प्रतिबन्धित लागूऔषध खैरो हेरोइनसहित एक जना पक्राउ परेका छन्।

जिल्ला प्रहरी कार्यालय धनकुटा र प्रहरी चौकी हिलेबाट खटिएको संयुक्त टोलीले धनकुटा नगरपालिका–१ स्थित हिले क्याम्पस नजिक सडकमा शंकास्पद रूपमा हिँडिरहेका एक व्यक्तिलाई जाँच गर्ने क्रममा खैरो हेरोइन बरामद गरेको हो।

पक्राउ पर्नेमा पाख्रिबास नगरपालिका–७ मुगा टोल निवासी ३२ वर्षीय हरि तामाङ रहेका छन्। प्रहरीका अनुसार उनको शरीर खानतलासी गर्दा गोजीमा लुकाइराखिएको हरियो प्लास्टिकभित्र खैरो हेरोइनजस्तो देखिने लिसाइलो पदार्थ फेला परेको थियो।

जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीका अनुसार उक्त पदार्थ १८ वटा साना प्याकेटमा राखिएको अवस्थामा बरामद गरिएको हो। बरामद पदार्थको तौल प्लास्टिकसहित १ ग्राम ६८० मिलिग्राम र प्लास्टिकबाहेक १ ग्राम रहेको प्रहरीले जनाएको छ।

पक्राउ परेका तामाङविरुद्ध लागूऔषध सम्बन्धी कसुरमा जिल्ला अदालत धनकुटाबाट म्याद थप गरी थप अनुसन्धान भइरहेको प्रहरीले जनाएको छ।