नेपाल काभा भलिबलको सेमिफाइनलमा इरानसँग पराजित

नेपाली राष्ट्रिय महिला भलिबल टोली घरेलु मैदानमा जारी काभा महिला भलिबल च्याम्पियनसिपको सेमिफाइनलबाट बाहिरिएको छ।  बिहीबार भएको खेलमा नेपाललाई पराजित गरेसँगै इरान च्याम्पियनसिपमा एक सेट पनि नगुमाई फाइनलमा पुगेको हो। राष्ट्रिय खेलकुद परिषदको बहुउदेश्यीय कभर्ड हलमा भएको दोस्रो सेमिफाइनलमा नेपाल इरानसँग ३–० को सोझो सेटमा पराजित भयो। इरानले घरेलु टोली नेपाललाई २५–२०, २५–१५ र २५–११ ले सहजै पराजित गरेको हो।

पहिलो सेटको सुरुवातमा नेपालले ईरानमाथि केही दबाब बनाएको थियो। तर दोस्रो सेटमा केही कमजोर देखिएको नेपाली टोली तेस्रो सेटमा इरानसामु निरिह बन्यो। नेपालले अब तेस्रो स्थानका लागि भारतसँग खेल्नेछ। नेपाल सेमिफाइनलबाटै बाहिरिएपछि उपाधिका लागि समूह चरणकै टोली फेरि एकआपसमा भिड्ने भएका हुन्। समूह चरणमा भएको भेटमा नेपाल भारतसँग ३–२ को सेटमा पराजित भएको थियो। आजै भएको पहिलो सेमिफाइनलमा भारतलाई ३–० को सोझो सेटमा हराउँदै काजकस्तान फाइनलमा पुगेको छ। काजकस्तानले भारतलाई २५–२१, २५–१७ र २५–१४ ले सहजै पाखा लगायो। समूह चरणमा इरानले काजकस्तानलाई ३–० को सोझो सेटमा हराएको थियो।