नेता रिहाइका लागि राप्रपाले आमसभा गर्ने, दबाबका कार्यक्रम निरन्तर चल्ने

२३ चैत, काठमाडौँ-

गत चैत १५ मा पक्राउ परेकाको रिहाइका लागि राष्ट्रिय प्रजातन्त्र पार्टी (राप्रपा) ले चरणवद्ध आन्दोलन गर्ने भएको छ। राप्रपाका प्रवक्ता मोहन श्रेष्ठका अनुसार २६ चैतमा काठमाडौँमा बागमती प्रदेश स्तरीय शक्ति प्रदर्शन गर्ने र अन्य विविध कार्यक्रम समेत गर्ने छ। पक्राउ परेकाको रिहाका लागि अहिले पनि राप्रपा आन्दोलित छ।

पक्राउ परेलगत्तै २४ घण्टे समय दिएर राप्रपाले देशभर मसाल जुलुस निकालेको थियो । त्यसपछि माइतीघर मण्डलमा प्रदर्शन गरेको राप्रपाका अध्यक्ष राजेन्द्र लिङदेनले कार्यबाहक प्रधानमन्त्री प्रकाशमान सिंहलाई बिहीबार ज्ञापनपत्र बुझाएका छन् । तीनकुने प्रदर्शन हिंसात्मक बन्नुमा सरकार जिम्मेवार रहेको निष्कर्षसहित राप्रपाले गृहमन्त्री रमेश लेखकको राजीनामा मागिरहेको छ । गृहमन्त्री रमेश लेखकको राजीनामा, सम्बन्धित प्रहरी र प्रशासनिक नेतृत्वका अधिकारीहरुको निलम्बन लगायत माग राखेर राप्रपाले २६ चैतमा शक्ति प्रदर्शनको तयारी गरेको छ ।