१४ चैत, काठमाडौँ । अख्तियार दुरुपयोग अनुसन्धान आयोगले सिराहाको कर्जन्हा नगरपालिकाका तत्कालीन नगर प्रमुख गंगा पासमानसहित ५ जनाविरुद्ध भ्रष्टाचार मुद्दा दायर गरेको छ ।

प्रशासनिक भवन निर्माणमा अनियमितता गरेको आरोपमा पासमानका साथै तत्कालीन निमित्त प्रमुख प्रशासकीय अधिकृतद्वय जगदीश मण्डल र  बुद्धिमान दनुवारविरुद्ध बुधवार विशेष अदालत काठमाडौंमा मुद्दा दायर गरिएको आयोगले जनाएको छ । आयोगका प्रवक्ता नरहरि घिमिरेका अनुसार लेखापाल प्रविनकुमार महतो र निर्माण व्यवसायी महालक्ष्मी/पाण्डे एन्ड कम्पनी/ड्रागन जेभीका आधिकारिक प्रतिनिधि बैजनाथ यादवलाई पनि प्रतिवादी बनाइएको छ ।​ उनीहरूविरुद्ध १ करोड ८ लाख रुपैयाँ बिगो कायम गरी सोही बराबरको जरिबाना र कैद दुवै सजायको मागदाबी आयोगले गरेको छ ।

कर्जन्हा नगरपालिकाबाट आर्थिक वर्ष २०७८/०७९ मा प्रशासनिक भवन निर्माणको लागि भएको ठेक्कामा अनियमितता भएको उजुरी आयोगमा परेको थियो । सोही उजुरीका आधारमा अनुसन्धान हुँदा तत्कालीन पासमान  र अधिकृत जगदीश मण्डलले उच्च अदालत जनकपुरको परमादेशको पालना नगरेको पाइएको थियो । उच्चको परमादेशविपरीत स्थानीय तहको केन्द्र परिवर्तन नहुँदै प्रशासनिक भवन बनाउनको लागि बोलपत्र आव्हानको लागि निर्णय गरी सार्वजनिक सम्पत्तिको हानि नोक्सानी गरिएको आयोगले जनाएको छ ।