काठमाडौं ।

निर्वाचन आयोगले ७६ जनाको नाम समानुपातिक बन्दसूचीबाट हटाएको छ । आयोगका अनुसार, चारजना उमेर नपुगेका, एकजना मतदाता नामावलीमा नाम नभएका छन् ।  २१ कालोसूचीमा, १२ जरिवाना नतिरेका, एकजना  महिला पेस गर्नुपर्नेमा पुरुष गरेकोमा हटाइएको छ । दोहोरो उमेदवार, जो प्रदेशतर्फको समानुपातिक बन्दसूचीमा रहेका २६ जनाको नाम हटाइएको समानुपातिक निर्वाचन प्रणालीतर्फका सहायक निर्वाचन अधिकृत यज्ञप्रसाद भट्टराईले जानकारी दिए ।

“०७९ को निर्वाचनमा उमेदवार भई खर्च विवरण सार्वजनिक नगरेपछि आयोगले जरिवाना लगाएको थियो, त्यो जरिवाना नबुझाई अहिले उमेदवार बनेकालाई समानुपातिक बन्दसूचीबाट हटाइएको हो,” भट्टराईले भने ।
आयोगले गत माघ ४ मा आउँदो फागुन २१ गते हुने प्रतिनिधिसभा सदस्य निर्वाचनअन्तर्गत  समानुपातिकतर्फका उमेदवारहरूको सूची सार्वजनिक गरेको थियो । समानुपातिकतर्फ दलहरूले बढीमा ११० जनासम्म उमेदवारको सूची आयोगमा बुझाएका थिए । समानुपातिकतर्फ ११० जना उमेदवार विजयी हुने व्यवस्था छ । समानुपातिक बन्दसूचीमा कुल ३२ सय १३ उमेदवारको नाम आयोगले सार्वजनिक गरेको थियो । समानुपातिक निर्वाचन प्रणालीका लागि आवश्यक पर्ने दुई करोड आठ लाख ५४ हजार ८००  मतपत्र छपाइ समेत सम्पन्न भइसकेको छ ।