कुलमान घिसिङले मन्त्री पदबाट राजीनामा दिँदै
२३ पुस, काठमाडौं ।
ऊर्जामन्त्री कुलमान घिसिङले पदबाट राजीनामा दिने निर्णयमा पुगेका छन् । उनले अहिले केहिबेरमा प्रधानमन्त्री सुशीला कार्कीसमक्ष राजीनामा बुझाउने तयारी गरेका छन् । प्रधानमन्त्री सुशीला कार्कीले मन्त्रीपरिषद वैठकमा राजनीतिक दलमा जोडिएका मन्त्रीहरुलाई मार्गप्रशस्त गर्न आग्रह गरेकी थिइन् । घिसिङ रास्वपामा औपचारिकरूपले जोडिएपछि राजीनामा दिने सोचमा थिए ।
स्रोतले भन्यो, ‘उहाँ रास्वपाको उपसभापति बन्ने सहमति भएको हो, त्यसको कार्यान्वयन हुन बाँकी छ । त्यस अर्थमा म कुनै पार्टीको सदस्य छैन भन्नुभएको थियो । तर अनावश्यकरुपमा दवाव सिर्जना गरियो ।’ घिसिङ रास्वपाबाट आगामी आमनिर्वाचनमा भाग लिने योजनामा छन् । काठमाडौं ३ बाट उम्मेदवारी दिने उनको तयारी छ । निर्वाचनमा उम्मेदवारी दर्ता गर्नुअघि राजीनामा दिने घिसिङले बताउँदै आएका थिए । रास्वपा स्रोतका अनुसार पछिल्ला दुई दिनमा घिसिङले राजनीतिक भेटघाट गरेका छैनन् । उज्यालो नेपालका अध्यक्ष अनुपकुमार उपाध्यायलाई पनि उनले भेट नदिएको बुझिएको छ । उनले अहिले ९ बजे पत्रकार सम्मेलन गर्दै यस बारेमा जानकारी दिनेछन् ।
Post Comment