१२ मंसिर, सर्लाही।

नेपाली सेना, सशस्त्र प्रहरी र जिल्ला प्रहरी कार्यालय सर्लाहीले संयुक्त रूपमा हुल–दंगा तथा आगलागी नियन्त्रण सम्बन्धी नमुना अभ्यास गरेका छन्। आन्दोलनको क्रममा हुने धनजनको क्षति रोक्न जिल्लाका सुरक्षा निकायद्वारा यस्तो अभ्यास गरिएको हो। आज शुक्रबार कविलासीस्थित सशस्त्र प्रहरी बलको प्राङ्गणमा गरिएको अभ्यासमा आन्दोलनको क्रममा अपनाइने कार्यविधि प्रदर्शन गरिएको थियो।

अभ्यासमा सुरक्षाकर्मीहरूले हुल व्यवस्थापन, दंगा नियन्त्रणका उपाय, आगलागी रोकथाम र उद्धारका विधिहरू देखाएका थिए। कार्यक्रममा कविलासी नगरपालिकाका नगरप्रमुख ब्रम्देव राय प्रमुख अतिथि रहेका थिए भने उप–प्रमुख पुनम कर्ण, निमित्त प्रमुख जिल्ला अधिकारी शिवहरी पोखरेल, नेपाली सेना कालिध्वज गण पाँचकुमारी नवलपुरका सेनानी उमेश खड्का, जिल्ला प्रहरी प्रमुख एसपी योगेन्द्र कुमार खड्का, सशस्त्र प्रहरी नं. १० गणका उपरीक्षक देवबहादुर चन्दसहित स्थानीय, समाजसेवी र पत्रकारहरूको उपस्थित रहेको थियो।

कार्यक्रमलाई सम्बोधन गर्दै निमित्त प्रमुख जिल्ला अधिकारी पोखरेल र उप–प्रमुख कर्णले सुरक्षानिकायबीचको संयुक्त अभ्यासले आकस्मिक परिस्थितिमा फिल्डमा अझ प्रभावकारी ढंगले काम गर्न मद्दत गर्ने धारणा राखे।