सर्लाही। पत्रकारिता क्षेत्रलाई डिजिटल युगसँग सुसम्बद्ध बनाउन “पत्रकारिता डिजिटल साक्षरता, लैङ्गिक संवेदनशील रिपोर्टिङ र गो ग्रिन पहलहरू” विषयक एक दिने तालिम सम्पन्न भएको छ ।

हिजो सर्लाही सदरमुकाम मलंगवामा इन्टरनेशनल अलर्टको सहयोग, सुनौलो सिसौट नेपालको आयोजनामा तथा नेपाल पत्रकार महासंघ सर्लाही शाखाको समन्वयमा आयोजित उक्त तालिममा पत्रकारितामा डिजिटल साक्षरताको महत्त्व, लैङ्गिक समानता र संवेदनशील समाचार लेखनका अभ्यासहरू, साथै वातावरणमैत्री (‘गो ग्रिन’) पत्रकारिता सम्बन्धी विषयमा विस्तृत प्रशिक्षण प्रदान गरिएको थियो।

तालिमका प्रशिक्षक राष्ट्रिय समाचार समिति (रासस) का अध्यक्ष तथा अनुभवी पत्रकार धर्मेन्द्र झा रहेका थिए । उहाँले सहभागी पत्रकारहरूलाई पत्रकारितामा प्रविधिको प्रभावकारी प्रयोग र डिजिटल साक्षरताको आवश्यकता बारे प्रशिक्षण दिनुभयो । साथै, उहाँले समाजको यथार्थ चित्रणका लागि लैङ्गिक सन्तुलित तथा संवेदनशील रिपोर्टिङका अभ्यास र वातावरणमैत्री दृष्टिकोणसहित समाचार सामग्री निर्माणका उपायबारे सहभागीहरूसँग अन्तरक्रिया गर्नुभयो ।

कार्यक्रमको अन्त्यमा तालिमका सहभागीहरूलाई प्रशिक्षक धर्मेन्द्र झा, इन्टरनेशनल अलर्टकी एशिया डाइरेक्टर रविना श्रेष्ठ, संस्थाकी प्रतिष्ठा थापा, सुनौलो सिसौट नेपालका अध्यक्ष अरुणप्रताप सिंह तथा नेपाल पत्रकार महासंघ सर्लाही शाखाका अध्यक्ष ओमप्रकाश ठाकुरलगायतले प्रमाणपत्र वितरण गरेका छन् ।