बजेटको चरम दुरूपयोग गरिएको र जनताको करलाई नेताको भुँडी भराउने काम गरिएको समेत उनले बताए । सरकारपिच्छेको मनोमानी कर आतङ्कले नेपाली जनता, उद्योगी, व्यापारीको व्यापार व्यवसाय धराशायी बन्दै गइरहेको आजपा अध्यक्ष साहले बताए ।  कांग्रेस र एमालेको अहिलेको वर्तमान गठबन्धन अप्राकृतिक, असंवैधानिक र अलोकतान्त्रिक भएको बताउँदै उनले कोर्स करेक्सन गर्नुपर्ने बताए ।‘केपी ओलीजस्तो नाटककारलाई कांग्रेसले बोकिरहँदा देशले दुःख पायो । शेरबहादुर देउवाले तत्काल कोर्स करेक्सन गर्नुपर्छ । नेचुरल गठबन्धनमा जाँदा नै देशको हित हुन्छ । केपी ओली अहिले पनि विरोधीलाई तर्साउने खेलमा छन् । सकेसम्म सानालाई निल्ने उनको प्लान हो,’ आजपा अध्यक्ष साहले भने  ।  ओली नेतृत्वको सरकार नेपाली जनताका लागि बोझ भएको टिप्पणी उनले गरे । अहिले आएर कांग्रेस र एमालेकै नेताकार्यकर्ताका लागि सरकार बोझ भइसकेको टिप्पणी उनले गरे । स्वार्थको गठजोडले गर्दा अहिलेसम्म टिकेको गठबन्धन अब विस्फोटन हुने बेला भइसकेको उनले बताए ।  ‘यो सरकार नेपाली जनताको लागि बोझ भएको थियो । अहिले त कांग्रेस र एमालेकै कार्यकर्ताहरूको लागि पनि ठुलो बोझ भएको छ । स्वार्थहरूको गठजोडले गर्दा अहिलेसम्म टिकेको हो, अब विस्फोटन हुने बेला भैसकेको छ ।

यो सरकार कुनै पनि मोर्चामा सफल छैन । न राष्ट्रिय राजनीति सङ्लो छ । न विदेश सम्बन्ध सन्तुलित छ । यो सरकारले जताततै भाँडभैलो र उपद्रो मच्चाएको छ,’ आजपा अध्यक्ष साहले भने, ‘सरकारले अर्थतन्त्र धराशायी बनायो । देशभरि सडकहरूको कन्तबिजोग छ । तर, प्रधानमन्त्री वर्षौँदेखि थालिएको कामको ग्वार्को ओभरपासलाई ‘फ्लाईओभर’ भनेर रिबन काट्न जानुहुन्छ । यो नाटक बन्द गर्नुहोस् । राजमार्गमा दिउँसै बसहरू अलपत्र छन् । त्रिशूलीमा खसेका बस अहिलेसम्म अत्तोपत्तो छैन । दैनिक लाखौं जनता ओहोरदोहोर गर्ने राजमार्गहरूको हालत कस्तो छ ?’ यस्तै, आजपा अध्यक्ष साहले वीरगन्जबाट तीन जना नेता सङ्घीय सरकारमा भए पनि बजेटमा वीरगन्जले न्याय नपाएको बताए । वीरगन्जको नारायणी अस्पताललाई मेडिकल कलेज, ठाकुरराम क्याम्पसलाई विश्वविद्यालय, नारायणी रङ्गशालालाई अन्तर्राष्ट्रिय स्तरको स्मार्ट र स्तरीय रङ्गशाला र वीरगन्जलाई आर्थिक राजधानीको रूपमा सरकारले घोषणा गर्दै सोही अनुसार बजेट दिने विश्वास भए पनि त्यसो नभएकोमा उनले दुख व्यक्त गरे ।

‘वीरगन्जबाट तीन तीन जना सङ्घीय सरकारमा मन्त्री हुनुहुन्छ । मलाई विश्वास थियो बजेटले वीरगन्जलाई न्याय गर्छ । तर त्यसो भएन । वीरगन्जको नारायणी अस्पताललाई मेडिकल कलेज, ठाकुरराम क्याम्पसलाई विश्वविद्यालय, नारायणी रङ्गशालालाई अन्तर्राष्ट्रिय स्तरको स्मार्ट र स्तरीय रङ्गशाला र वीरगन्जलाई आर्थिक राजधानीको रूपमा सरकारले घोषणा गर्दै सोही अनुसार बजेट दिने विश्वास मलाई थियो । किनभने, यहाँबाट (वीरगन्ज) तीन जनता सङ्घीय सरकारमा मन्त्री हुनुहुन्छ,’ आजपा अध्यक्ष साहले भने, ‘तर कांग्रेसकै खेलकुद मन्त्री छ र कांग्रेसले यहाँ हस्ताक्षर अभियानको नाटक गरिरहेको छ । एक जना मन्त्रीले वीरगन्जमा आउँदा अर्बौँको बजेट ल्याएको भन्नुहुन्छ । तर जब काठमाडौँ पुग्नुहुन्छ अनि भन्नु हुन्छ वीरगन्जले बजेट नै पाएन । यो नाटक बन्द गर्नुस् तपाईँहरू ।’यस्तै उनले मधेसमा विद्यार्थी अनुपातमा विषयगत र तहगत शिक्षकको व्यवस्था हुनुपर्ने भए पनि सरकार मधेसका विद्यार्थीप्रति संवेदनशील नभएको बताए ।विद्यार्थीको अनुपातमा शिक्षक नभएको बताउँदै उनले सरकारले मधेसको शिक्षा प्रणाली नै ध्वस्त बनाउन खोजेको आरोप लगाए ।