२९ वैशाख, काठमाडौं ।

भारतीय क्रिकेट टोलीका अनुभवी ब्याट्सम्यान तथा पूर्व कप्तान विराट कोहलीले टेस्ट क्रिकेटबाट सन्यासको घोषणा गरेका छन्। १४ वर्ष लामो शानदार टेस्ट करियरलाई बिट मार्दै उनले आज सामाजिक सञ्जालमार्फत सन्यासको घोषणा गरेका जानकारी दिएका हुन् । १२३ टेस्ट खेलेका कोहलीले ६८ खेलमा कप्तानी गर्दै ४६.८५ को औसतमा ९२३० रन बनाएका छन्। आफ्नो भावुक सन्देशमा कोहलीले टेस्ट क्रिकेटले आफूलाई धेरै सिकाएको र यो प्रारूपसँग आफ्नो गहिरो सम्बन्ध रहेको बताएका छन्।

उनले भनेका छन्, “सेतो जर्सीमा खेल्नुको आफ्नै महत्व छ। शान्त मिहिनेत, लामो दिनहरू, साना क्षणहरू जुन कसैले देख्दैन तर सधैं तपाईंसँग रहन्छ।” उनले यो निर्णय सहज नभएको तर सही महसुस भएको बताए। रोहित शर्माले टेस्ट क्रिकेटबाट सन्यास लिएसँगै उनले पनि याे निर्णय लिएका हुन् । कोहलीले सन् २०११ मा वेस्ट इन्डिजको भ्रमणमा टेस्टमा डेब्यु गरेका थिए। किङ्स्टनमा पहिलो खेलमा ४ र १५ रन बनाएका उनले त्यस भ्रमणका पाँच इनिङमा जम्मा ७६ रन मात्र जोडेका थिए । तर, त्यसै वर्ष मुम्बईको वानखेडे स्टेडियममा वेस्ट इन्डिजविरुद्ध उनले ५२ र ६३ रनको पारी खेलेर आफ्नो क्षमताको झलक देखाएका थिए। त्यसपछिको अस्ट्रेलिया भ्रमण भारतका लागि खराब रह्यो (भारत ४-० ले पराजित भएको थियो), तर कोहलीले एडिलेड टेस्टमा आफ्नो पहिलो शतक बनाएर श्रृंखलाको अन्त्य सुखद बनाएका थिए।