काठमाडौँ महानगरमा तनाव : प्रमुख प्रशासकीय अधिकृत गुरागाईंलाई हाजिर गराउन रोक, नगर प्रहरी तैनाथ

२१ चैत, काठमाडौँ-

काठमाडौँ महानगरपालिकामा प्रमुख प्रशासकीय अधिकृत सरोज गुरागाईंलाई हाजिर गराउन नदिने निर्णयसँगै नगर प्रहरी तैनाथ गरिएको छ। कार्यालयमा केही कर्मचारी र वडाध्यक्षहरू उपस्थित भए पनि वातावरण तनावग्रस्त बनेको छ।

महानगरपालिकाका कर्मचारीहरूले गुरागाईंको निरन्तरताको माग गरेका छन्। एक महिला कर्मचारीले संघीय सरकार र महानगर प्रमुख बालेन शाह दुवैप्रति रोष पोख्दै भनिन्, ‘कर्मचारीलाई अन्याय गरिएको छ। संविधानविपरीत जान कसैलाई अधिकार छैन। यो व्यवस्थागत अन्याय हो।’ अर्का कर्मचारीले पनि गुरागाईंको पक्षमा बोल्दै भने, ‘उहाँले गलत काम गर्नुभएको छ भने कानुनी प्रक्रियाबाट कारबाही गर्नुपर्छ। कुनै व्यक्तिको सामाजिक सञ्जाल स्टाटसकै आधारमा यस्ता निर्णय लिनु गलत हो।’

काठमाडौँ महानगरपालिकाले भने गुरागाईंमाथि भ्रष्टाचारको आरोप लगाएको छ। मेयर बालेन शाहले केही दिनअघि आफ्नो फेसबुक स्टाटसमार्फत गुरागाईंमाथि आर्थिक अनियमितताको आरोप लगाएका थिए। तर, महानगरकै कर्मचारी नरबहादुर कर्मचार्यले यसबारे असहमति जनाउँदै भने, ‘मेयरको फेसबुक स्टाटसकै भरमा महानगर चल्दैन। कानुनी प्रक्रियालाई मान्यता दिनुपर्छ।’ महानगर कार्यालय परिसरमा प्रहरी परिचालन गरिएको छ। कर्मचारीहरू आन्दोलित भइरहेका छन् भने परिस्थिति अझै सामान्य हुन सकेको छैन। संघीय सरकार र महानगर नेतृत्वबीचको यो विवाद चर्किंदै जाँदा कामकाजमा असर परेको छ।