पाकिस्तानविरुद्धको तीन खेलको एक दिवसीय सिरिज न्युजील्याण्डले एक खेल अगावै जितेको छ । आज भएको खेलमा बेन सेयर्सले ५९ रन खर्चिएर पाँच विकेट झारेपछि पाकिस्तानलाई २०८ रनमा अलआउट हुँदा न्युजिल्यान्डले दोस्रो एकदिवसीय खेलमा ८४ रनको फराकिलो जित हासिल ग¥यो। यस जितसँगै न्युजिल्यान्डले तीन खेलको शृङ्खला २–० ले अग्रता पनि लियो ।

पाकिस्तानका लागि फहीम असरफले सर्वाधिक ७३ रन बनाए भने उनले नवौं विकेटका लागि नसीम शाहसँग ६० रनको साझेदारी गरे । नसीम शाहले ५१ रन बनाए । दुबै खेलाडीले आफ्नो पहिलो एकदिवसीय अर्धशतक पूरा गरे । पाकिस्तान ४१.२ ओभरमा अलआउट भएको थियो । विल ओ रुर्केले उत्कृष्ट बलिङ प्रदर्शन गर्दै पहिलो ६ ओभरमा मात्र ८ रन खर्चेर एक विकेट लिए ।  जेकब डफीले ३५ रन खर्चेर तीन विकेट लिए भने सेयर्सले आफ्नो डेब्यू खेलमै पाँच विकेट लिए ।

यसअघि, मिच हेय ९९ रनमा नटआउट रहेपछि न्युजिल्यान्डले २९२–८ को प्रतिस्पर्धात्मक स्कोर बनाएको थियो । हेयले अन्तिम ओभरमा २२ रन बटुले, जसमा दुई छक्का र दुई चौका समावेश थिए। उनको पहिलो एकदिवसीय शतक मात्र एक रनले छुट्न पुग्यो । वासिमले १५ रन खर्चेर एक विकेट लिए भने सुफियानले २९ रन खर्चेर दुई विकेट लिए । न्युजिल्यान्डले पहिलो १५ ओभरमा ९७–२ को राम्रो सुरुवात गरेको थियो । हेयले ६१ बलमा अर्धशतक पूरा गरेपछि बाँकी १७ बलमा ४९ रन थपे । न्युजिल्यान्डका ओपनर राइस मारिउ (१८) र निक केली (३१) ले पहिलो विकेटका लागि ५४ रनको साझेदारी गरे । डेरिल मिचेलले १८ रन बनाए । तर, मध्यक्रममा विकेट गुम्दै गएपछि रन बनाउन कठिन बन्यो ।

पाकिस्तानका नवप्रवेशी मोहम्मद अब्बास, जसले पहिलो खेलमा मात्र २४ बलमा ५० रन बनाउँदै एकदिवसीय डेब्यूमा सबैभन्दा छिटो अर्धशतक बनाएका थिए, दोस्रो खेलमा भने सुस्त खेले । उनले ६६ बलमा ४१ रन बनाए । पाकिस्तानका लागि न्युजिल्यान्डको तीब्र गतिका बलिङ आक्रमण चुनौतीपूर्ण सावित भयो । पहिलो तीन विकेट—अब्दुल्लाह शफिक, इमाम–उल–हक र बाबर आजम— जम्मा ९ रनमै गुमे । रिजवानले ओ रुर्केको बलिङको सामना गर्न संघर्ष गरे र २७ बलमा मात्र ५ रन बनाए । न्युजिल्यान्डले पहिलो खेल ७३ रनले जितेको थियो । तेस्रो खेल शनिबार माउन्ट माउन्गानुइमा हुनेछ । न्युजिल्यान्डले यसअघि भएको टी–२० शृङ्खला ४–१ ले जितेको थियो ।