३० भदौ, काठमाडौं । अमेरिकाबाट काठमाडौं आएका एक व्यक्ति त्रिभुवन अन्तर्राष्ट्रिय विमानस्थलबाटै बेपत्ता भएका छन् ।बेपत्ता हुनेमा पर्वतको पैंयू गाउँपालिका–१ घर भएका ७६ वर्षीय दण्डपाणि भुसाल छन् । उनी शनिबार राति १०ः२५ बजेदेखि एअरपोर्टबाट बेपत्ता भएका भुसालका ज्वाईं मधु वस्तीले बताए । विमानस्थलमा आर्लेपछि भिडिओ कल समेत भएको र त्यसपछि भुसाल बेपत्ता भएको वस्तीले बताए । राति १०ः२५ बजे विमानस्थलबाट बाहिर निस्केको सीसी क्यामेरामा समेत देखिए पनि त्यहाँबाट कता गए भन्ने पत्तो नलागेको उनले बताए ।अमेरिकाबाट दुबई ट्रान्जिट भएर हिमालयन एअरलाइन्समार्फत भुसाल शनिबार राति काठमाडौं ओर्लिएका थिए । ‘एक जना सिस्टरको साथ लगाएर अमेरिकाबाट पठाएको रहेछ । विमानस्थलबाट बाहिर निस्केपछि झोला छुट्यो भन्दै भित्र लिन जानुभयो । त्यही बेलामा सिस्टर उहाँको सामान विमानस्थलमै छाडेर जानु भएछ । झोला कागजात सबै भेटियो तर उहाँ भेटिनु भएको छैन,’वस्तीले भने । लेखपढ गर्न नजान्ने भुसाल हराएपछि आफन्तले प्रहरी वृत्त गौशालामा निवेदन दिएका छन् । गौशाला वृत्तका डीएसपी केशव थेबेले दण्डपाणि भुसाल हराएको भन्दै निवेदन आएको पुष्टि गरे । ‘हराएको भन्दै निवेदन आएको छ । हामीले खोजी कार्य सुरु गरेका छौं’ थेबेले  भने ।