दाङको होटलमा एनपीएलको सट्टेबाजी, भारतीय नागरिकसहित पाँच पक्राउ
सारांश
- नेपाल प्रिमियर लिग (एनपीएल) लगायत विभिन्न राष्ट्रिय तथा अन्तर्राष्ट्रिय खेलकुद प्रतियोगितामा अनलाइन सट्टेबाजी गराउने पाँच जनालाई प्रहरीले पक्राउ गरेको छ ।
- पक्राउ पर्नेमा एक जना नेपाली र चार जना भारतीय नागरिक रहेका छन् ।
- जिल्लाको लमही नगरपालिका–५, रातोडाँडास्थित जस्मिन होटल एन्ड लजको तेस्रो तलामा रहेका कोठा नम्बर २०३ र २०४ भाडामा लिई अनलाइन सट्टेबाजीका प्लेटफर्म सञ्चालन भइरहेको भन्ने विशेष सूचनाका आधारमा लुम्बिनी प्रदेश प्रहरी कार्यालय दाङबाट खटिएको विशेष टोलीले छापा मारेको थियो ।
दाङ ।
नेपाल प्रिमियर लिग (एनपीएल) लगायत विभिन्न राष्ट्रिय तथा अन्तर्राष्ट्रिय खेलकुद प्रतियोगितामा अनलाइन सट्टेबाजी गराउने पाँच जनालाई प्रहरीले पक्राउ गरेको छ । पक्राउ पर्नेमा एक जना नेपाली र चार जना भारतीय नागरिक रहेका छन् ।

जिल्लाको लमही नगरपालिका–५, रातोडाँडास्थित जस्मिन होटल एन्ड लजको तेस्रो तलामा रहेका कोठा नम्बर २०३ र २०४ भाडामा लिई अनलाइन सट्टेबाजीका प्लेटफर्म सञ्चालन भइरहेको भन्ने विशेष सूचनाका आधारमा लुम्बिनी प्रदेश प्रहरी कार्यालय दाङबाट खटिएको विशेष टोलीले छापा मारेको थियो ।
बिहीबार साँझ करिब साढे सात बजे उक्त होटलमा खानतलासी तथा चेकजाँच गर्दा ‘कुश ७७७’ लगायतका अनलाइन बेटिङ प्लेटफर्ममार्फत सट्टेबाजीको कारोबार सञ्चालन गरिरहेको अवस्थामा उनीहरूलाई नियन्त्रणमा लिइएको प्रहरीले जनाएको छ ।

प्रहरीले घटनास्थलबाट सट्टेबाजी कारोबारमा प्रयोग भएका विभिन्न कम्पनीका दुई थान डेस्कटप कम्प्युटर, तीन थान ल्यापटप र १३ थान मोबाइल फोन गरी जम्मा १८ थान विद्युतीय उपकरण बरामद गरेको छ ।
पक्राउ परेका पाँचै जनालाई बरामद सामग्रीसहित आवश्यक अनुसन्धान तथा कानुनी कारबाहीका लागि इलाका प्रहरी कार्यालय लमहीमा बुझाइएको प्रहरीले जानकारी दिएको छ ।
प्रतिक्रिया