पदमार्ग बनाउन आएका दुई मजदुरको चट्याङ लागेर मृत्यु

१४ वैशाख, पोखरा –

कास्कीमा पदमार्ग निर्माणमा खटिएका दुई मजदुरको चट्याङ लागेर मृत्यु भएको छ। आइतबार दिउँसो १ बजे कास्कीको अन्नपूर्ण गाउँपालिका–११ पोंडे चट्याङ पर्दा दुई मजदुरले ज्यान गुमाएका हुन्। संखुवासभाको सिलीचोङ गाउँपालिका–२ का ४४ वर्षीय भरतकुविँर राई र १८ बर्षीय महेश राईको मृत्यु भएको जिल्ला प्रहरी कार्यालय कास्कीका सूचना अधिकारी डिएसपी बसन्तकुमार शर्माले जानकारी दिए। ‘जिल्ला प्रहरी कार्यालयबाट टोली गएको छ’, उनले भने।

अन्नपूर्ण गाउँपालिका–११ का वडाध्यक्ष हिमबहादुर गुरुङका अनुसार हिँड्न लेक जाने पदमार्ग बनाउनेलाई ती मजदुर आएका हुन्। उनीहरु ९ जनाको समूहमा आएका थिए। ‘अरु काम गर्न गएका थिए। भान्छामा काम गर्न बसेका दुई जनाको मृत्यु भएको छ’, उनले भने।चट्याङ परेको स्थानमा पुग्नलाई पोखराबाट दुई दिनको समय लाग्छ। पर्यटकीय गाउँ घान्द्रुक हुँदै हिँड्न लेक पुगिने उनले जानकारी दिए।चिमाङ्गीमा पदमार्ग बनाउने, रेलिङ राख्ने कामका लागि पर्यटन बोर्ड गण्डकी र अन्नपूर्ण गाउँपालिकाले १८ लाख रुपैयाँ विनियोजन गरेका छन्। सोही बजेटको काम भइरहेको थियो। मेघगर्जनसहित चट्याङ परेपछि त्यहाँ असिनापानी र हिमपात भएको जनाइएको छ।