नबिल बैंकले गर्‍यो ७ अर्ब ९० करोड बढी नाफा

२० साउन, काठमाडौं ।

नबिल बैंकले गत आर्थिक वर्षमा ७ अर्ब ९० करोड ५७ लाख ९६ हजार रुपैयाँ खुद नाफा कमाएको छ। अघिल्लो आर्थिक वर्षमा ५ अर्ब ९२ करोड २१ लाख ४४ हजार रुपैयाँ नाफा कमाएको बैंकको नाफा यस वर्ष उल्लेख्य रूपमा बढेको हो। बैंकले सार्वजनिक गरेको चौथो त्रैमासिक अपरिष्कृत वित्तीय विवरणअनुसार सञ्चालन नाफा ११ अर्ब ५६ करोड ४५ लाख २६ हजार रुपैयाँ पुगेको छ।

त्यस्तै, खुद सञ्चालन आय १९ अर्ब ६५ करोड ७१ लाख ८८ हजार र कुल सञ्चालन आय २२ अर्ब ३३ करोड ४३ लाख ६१ हजार रुपैयाँ रहेको छ। समीक्षा अवधिमा बैंकको खुद ब्याज आम्दानी १७ अर्ब ९२ लाख ८८ हजार रुपैयाँ रहेको छ। यस्तै, वितरणयोग्य नाफा ५ अर्ब १६ करोड ९१ लाख ४८ हजार रुपैयाँ पुगेको छ, जुन अघिल्लो आर्थिक वर्षको ३ अर्ब ८५ करोड ५५ लाख ६ हजार रुपैयाँभन्दा बढी हो। वित्तीय विवरणअनुसार बैंकको प्रतिसेयर आम्दानी (EPS) २८ रुपैयाँ ३६ पैसा, प्रतिसेयर लाभांश क्षमता १९ रुपैयाँ १० पैसा तथा खराब कर्जा (NPL) ४.२० प्रतिशत रहेको छ।