बागमतीमा सशस्त्र प्रहरीको विपद् उद्धार सिमुलेसन अभ्यास

५ असार, सर्लाही।

सर्लाही र रौतहट जिल्लाको सिमानामा पर्ने बागमती नदीमा बाढी तथा डुबानजन्य विपद्का घटनामा उद्धार कार्यलाई प्रभावकारी बनाउन कृत्रिम घटना (सिमुलेसन) अभ्यास सम्पन्न भएको छ। शुक्रबार रौतहटको चन्द्रपुर नगरपालिका–१ र सर्लाहीको बागमती नगरपालिका–११ नुनथरस्थित बागमती नदीमा उक्त अभ्यास गरिएको हो। मधेश प्रदेशका गृह, सञ्चार तथा कानून मन्त्री फकिरा महतो को प्रमुख आतिथ्यमा आयोजित कार्यक्रममा विभिन्न स्थानीय तहका जनप्रतिनिधि, प्रमुख जिल्ला अधिकारी, सुरक्षा निकायका अधिकारी, सञ्चारकर्मीको सहभागिता रहेको थियो।

कार्यक्रमलाई सम्बोधन गर्दै मन्त्री महतोले विपद् जोखिम न्यूनीकरण तथा व्यवस्थापनलाई प्रदेश सरकारले प्राथमिकतामा राखेर काम गरिरहेको बताए। उनले विपद् व्यवस्थापनलाई परम्परागत सोचभन्दा माथि उठेर वैज्ञानिक, प्रविधिमैत्री र दीर्घकालीन योजनासहित अघि बढाउन आवश्यक रहेको उल्लेख गरे। साथै सुरक्षा निकायसँगको सहकार्य र समन्वयलाई थप सुदृढ बनाउने प्रतिबद्धता व्यक्त गरे। त्यस्तै, सशस्त्र प्रहरी बल नं. २ छिन्नमस्ता बाहिनीका बाहिनीपति सशस्त्र प्रहरी नायव महानिरीक्षक विष्णु प्रसाद भट्टले विपद्का बेला प्रभावकारी उद्धार तथा राहत कार्यका लागि यस्ता अभ्यास महत्वपूर्ण हुने बताए। उनले सशस्त्र प्रहरी बल राष्ट्र, नागरिक र मानवीय सेवामा सदैव समर्पित रहने पनि उल्लेख गरे।