जनताको घरघरमा छिरेर समस्यालाई बुझेर मात्र सदन प्रवेश गर्छु : बुद्धरत्न महर्जन

२३ फागुन,काठमाडौं ।

ललितपुर–१ बाट बुद्धरत्न महर्जन विजयी भएका छन् । राष्ट्रिय स्वतन्त्र पार्टी (रास्वपा) का उम्मेदवार महर्जनले कांग्रेसका उम्मेदवार उदयशमशेर जबरालाई झण्डै १० हजार मतान्तरले पराजित गर्दै विजय हासिल गरेका हुन् । निर्वाचन परिणामअनुसार महर्जनले २३ हजार ३७३ मत प्राप्त गरेका छन् भने उनका प्रतिस्पर्धी नेपाली कांग्रेसका सहमहामन्त्री जबराले १३ हजार ५२० मत प्राप्त गरेका छन् । विजयपछि प्रतिक्रिया दिँदै महर्जनले ललितपुर–१ का सम्पूर्ण मतदातालाई धन्यवाद व्यक्त गरेका छन् ।

उनले अमूल्य मत दिएर आफूलाई विजयी बनाएकोमा जनताप्रति कृतज्ञता व्यक्त गर्दै अब जनताकै बीचमा गएर काम गर्ने प्रतिबद्धता जनाएका छन् । ‘ललितपुर क्षेत्र नम्बर १ का सबै मतदातालाई धन्यवाद ज्ञापन गर्न चाहन्छु । अमूल्य मत दिएकोमा सम्पूर्ण जनतालाई धन्यवाद,’ उनले भने । महर्जनले सदनमा प्रवेश गर्नुभन्दा अघि आम जनताको घरघरमा पुगेर उनीहरूको समस्या बुझ्ने योजना बनाएको पनि बताएका छन् । जनताका समस्यालाई प्राथमिकतामा राखेर अगाडि बढ्ने उनको भनाइ छ ।

उनले भने, ‘अब सदन प्रवेश गर्नुभन्दा अगाडि आम जनताको घरघरमा छिरेर उहाँहरुको समस्यालाई बुझेर त्यसपछि मात्रै म सदन छिर्ने योजनामा छु । म आमजनताको समस्यालाई लिएर अगाडि बढ्न चाहन्छु ।’