झापामा ३ वर्षमा ७५ एचआईभी संक्रमितको मृ*त्यु
सारांश
- झापामा पछिल्लो तीन वर्षमा ७५ जना एचआईभी सङ्क्रमितको मृत्यु भएको छ ।
- जिल्लामा पछिल्लो तीन वर्षयता एचआईभी सङ्क्रमितको मृत्युदर वृद्धि हुँदै गएको स्वास्थ्य कार्यालय झापाका फोकल पर्सन वीरेन्द्र दासले जानकारी दिए ।
- २०७९/८० मा १७ जना, २०८०/८१ मा २३ जना र २०८१/८२ मा ३५ जनाको मृत्यु भएको उनले बताए ।
२२ मंसिर, झापा ।
झापामा पछिल्लो तीन वर्षमा ७५ जना एचआईभी सङ्क्रमितको मृत्यु भएको छ । जिल्लामा पछिल्लो तीन वर्षयता एचआईभी सङ्क्रमितको मृत्युदर वृद्धि हुँदै गएको स्वास्थ्य कार्यालय झापाका फोकल पर्सन वीरेन्द्र दासले जानकारी दिए । २०७९/८० मा १७ जना, २०८०/८१ मा २३ जना र २०८१/८२ मा ३५ जनाको मृत्यु भएको उनले बताए ।
‘उपचारमा आउने बिरामीमा औषधि नखाने दर शून्य झरेको छ,’ उनले भने, ‘तर, मृत्युदर भने बढेको छ ।’ चालू आर्थिक वर्षको साउनदेखि कात्तिक मसान्तसम्ममा २२ जना नयाँ एचआईभी सङ्क्रमित फेला परेका छन् । नयाँ सङ्क्रमितमध्ये चार जनाले दमक अस्पताल र १८ जनाले मेची प्रादेशिक अस्पतालबाट नियमित एआरटी औषधि सेवन गरिरहेका छन् । झापामा हालसम्म नयाँ तथा पुराना गरी ८०६ जना एचआईभी सङ्क्रमितले नियमित एआरटी सेवा लिइरहेका छन् । जिल्लामा कुल एचआईभी सङ्क्रमितमध्ये १८ वर्षमुनिका ३० जना बालबालिका रहेको फोकल पर्सन दासले बताए ।
स्वास्थ्य कार्यालय झापा र लवकुश आश्रमद्वारा १८ वर्ष मुनिका सङ्क्रमित बालबालिकाका लागि प्रतिमहिना एक/एक हजारको दरले सहयोग प्राप्त भइरहेको छ । नयाँ सचेतना समूह भद्रपुरमा रहेकोमा ३० जना सबै बालबालिकाले एआरटी सेवा लिँदै आइरहेका छन् । झापामा २०७९/८० मा नयाँ ७० जना र पुरानो गरी ६६३ जना, २०८०/८१ मा नयाँ ७४ र पुरानो गरी ७५० र २०८१/८२ मा नयाँ ५६ जना र पुरानो ७८४ एचआईभी सङ्क्रमित उपचाररत रहेको कार्यालयको तथ्यांक छ ।
प्रतिक्रिया