आफ्नै प्रेसबाट सरकारले सुरु गर्यो ड्राइभिङ लाइसेन्स छपाइ
सारांश
- सरकारले सवारी चालक अनुमतिपत्र (लाइसेन्स) आफैँ छपाइ गर्न थालेको छ ।
- सञ्चार तथा सूचना प्रविधि मन्त्रालयअन्तर्गतको सुरक्षण मुद्रण केन्द्रले आजदेखि नयाँ लाइसेन्स छपाइको कार्य प्रारम्भ गरेको हो ।
- सञ्चार तथा सूचना प्रविधिमन्त्री जगदीश खरेलले काभ्रेको बनेपास्थित मुद्रण केन्द्रको मसिनमा बटन थिचेर लाइसेन्स छपाइ कार्यको उद्घाटन गरे ।
२१ कात्तिक, काठमाडौँ ।
सरकारले सवारी चालक अनुमतिपत्र (लाइसेन्स) आफैँ छपाइ गर्न थालेको छ । सञ्चार तथा सूचना प्रविधि मन्त्रालयअन्तर्गतको सुरक्षण मुद्रण केन्द्रले आजदेखि नयाँ लाइसेन्स छपाइको कार्य प्रारम्भ गरेको हो । सञ्चार तथा सूचना प्रविधिमन्त्री जगदीश खरेलले काभ्रेको बनेपास्थित मुद्रण केन्द्रको मसिनमा बटन थिचेर लाइसेन्स छपाइ कार्यको उद्घाटन गरे । उनले कानुनी उल्झन र विविध कठिनाइबिच पनि आवश्यक तयारी पूरा गरी सरकारी प्रेसबाटै लाइसेन्स छपाइ सुरु गरिएको बताए ।
“वर्षौँदेखि थन्किएका मसिन र पार्टपूर्जा धुलाम्मे अवस्थामा थिए । अहिले हामीले ती सबै मर्मत गरी छपाइ सुरु गरेका छौँ,” मन्त्री खरेलले भने, “२८ लाख ड्राइभिङ लाइसेन्स छाप्नुपर्ने अवस्था छ । जनतालाई सुशासनको प्रत्याभूति दिने उद्देश्यले यो काम अघि बढाइएको हो ।” उनका अनुसार सुरक्षण मुद्रण केन्द्रका मेसिनबाट राष्ट्रिय परिचयपत्र, राहदानी, लालपुर्जा, हुलाक टिकट, स्टिकरलगायत सामग्री पनि छपाइ गर्न सकिने क्षमता छ । तर विगतमा विदेशी कम्पनीलाई ठेक्का दिँदा देशको ठुलो रकम बाहिर जाने र सुरक्षासम्बन्धी प्रश्न उठ्ने गरेको उनले उल्लेख गरे । मन्त्री खरेलले नीतिगत सुधार, कानुनी प्रक्रिया र स्रोत–साधन व्यवस्थापनमार्फत अबदेखि आवश्यक सरकारी मुद्रण कार्य क्रमशः केन्द्रमै गर्ने तयारी रहेको बताए । “अदालत र अख्तियारमा मुद्दा र उजुरीबिच पनि हामीले कानुनी बाटो मिलाएर यो सुरुवात गरेका हौँ । यसले मुलुकको पैसा बाहिर जान रोक्नेछ र राष्ट्रिय सुरक्षाका दृष्टिले पनि यो राम्रो कदम हो,” उनले भने ।
सुरक्षण मुद्रण केन्द्रका कार्यकारी निर्देशक देवराज ढुंगानाले कानुनी उल्झन र प्राविधिक जटिलता समाधानपछि आजदेखि छपाइ कार्य सुरु गरिएको जानकारी दिए । पहिलो चरणमा १२ लाख प्रति छपाइको सम्झौताअनुसार कार्य सुरु भएको हो । हाल दैनिक ५०० प्रति छपाइ सुरु भएको र क्रमशः उत्पादन क्षमता बढाउँदै लैजाने तयारी रहेको केन्द्रले जनाएको छ । कार्डमा आधारित छपाइ सुरु भएको छ भने कागजी छपाइको काम आगामी छ महिनाभित्र सुरु गरिने तयारी भइरहेको कार्यकारी निर्देशक ढुंगानाले जानकारी दिए । उनका अनुसार सुरक्षण मुद्रण केन्द्रबाट आजकै मितिदेखि नागरिकता, अन्तःशुल्क स्टिकर, हुलाक टिकट, लालपुर्जा र भिसा स्टिकर छपाइ गर्न सकिनेछ । केन्द्रमा हालसम्म करिब तीन अर्ब रुपैयाँ बराबरको लगानी भइसकेको छ ।
प्रतिक्रिया