देशभरका २१ वटा मालपोत कार्यालयमा क्षति

ती कार्यालयका अभिलेखसमेत नष्ट भएको विभागका प्रवक्ता खिमानन्द आचार्यले बताए। ‘देशभरका २१ वटा मालपोत कार्यालयमा क्षति भएको छ। कलंकी, धनगढीलगायतका कार्यालयमा ठूलो क्षति भएको छ,’ उनले भने, ‘अन्य कार्यालयमा भौतिक संरचनामात्रै क्षति भएको छ, कागजातहरू भने सुरक्षित छन्। तथ्याङ्क संकलन भइरहेको छ।’ कागजातसहित भौतिक संरचना समेत ध्वस्त भएका कार्यालयहरूले सूचना जारी गर्दै काम सुरु गरिसकेको प्रवक्ता आचार्यले जानकारी दिए।
‘वडा, गाउँपालिका, नगरपालिका कार्यालयहरू जलेका ठाउँमा केही कठिनाइ हुन्छ। तर सबै ठाउँमा अनलाइन प्रणाली छ। इन्ट्री भएको छैन कि भन्ने कुरा मात्र हो,’ उनले भने, ‘पुर्जा भएका ठाउँमा त्यही हेरेर पनि काम गर्न सकिन्छ।’

उनका अनुसार फिल्डमा गएर वा सिमाना साक्षीहरू (साँध–सिमाना देखाउनेहरू) सँग सोधेर पनि काम गर्न सकिन्छ। साथै, विभिन्न प्रयोजनका लागि सहकारी वा बैंकहरूमा बुझाइएको हुन सक्ने कागजातहरूको फोटोकपीबाट प्रमाण जुटाउन सकिने उनले बताए। मालपोत कार्यालय, कलंकीले भदौ २३ र २४ मा ‘जेनजी’ ले गरेको आन्दोलनका क्रममा भएको तोडफोड र आगजनीबाट कार्यालय भवन र अभिलेखहरू जलेर नष्ट भएका कारण सेवा प्रवाह बन्द भएको र स्रेस्ता पुनः निर्माणका लागि मंगलबार सूचना जारी गरेको छ। सूचनामा भनिएको छ, ‘सेवा प्रवाह पुनः सुचारु गर्न नष्ट भएका जग्गाधनी दर्ता स्रेस्ता तयार गर्न जग्गाधनी स्वयं उपस्थित भई भूमि प्रशासन निर्देशिका, २०८१ को दफा २१ अनुसार देहायका कागज–प्रमाणसहित निवेदन पेस गर्नुपर्नेछ।’