संविधान दिवसको अवसरमा लक्ष्मी बल्ड कनेक्टसद्वारा खुल्ला रक्तदान

३ असोज, सर्लाही ।

संविधान दिवस–२०८२ को अवसरमा मंगलबार लक्ष्मी ब्लड कनेक्ट्स, सर्लाहीको आयोजनामा र प्रादेशिक अस्पताल मलंगवाको सहयोगमा खुला रक्तदान तथा निःशुल्क रक्तसमूह परीक्षण कार्यक्रम सम्पन्न भएको छ।

कार्यक्रममा ५२ जनाले रक्तदान गरेका थिए, जसमा ४९ जना पुरुष र ३ जना महिला सहभागी थिए। त्यस्तै ५६ जनाले निःशुल्क रक्तसमूह परीक्षण गराएका छन्।

लक्ष्मी ब्लड कनेक्ट्सका अध्यक्ष कृष्ण कुमार राउतको अध्यक्षतामा सम्पन्न कार्यक्रममा प्रमुख अतिथिका रूपमा प्रमुख जिल्ला अधिकारी तुलसी बहादुर श्रेष्ठको उपस्थिति रहेको थियो। सो अवसरमा विशिष्ट अतिथिमा जिल्ला प्रहरी कार्यालय सर्लाहीका एसपी योगेन्द्र कुमार खड्का, सशस्त्र प्रहरी बल सर्लाहीका देव बहादुर चन्द, कालीध्वज गणका सेना प्रमुख र प्रादेशिक अस्पताल मलंगवाका प्रमुख डा. संजीव कुमार सिंह सहभागी थिए।

त्यस्तै, पहिचान नेपाल/Blue Diamond Society का अब्दुल सहमद, वडा नं. ९ का अध्यक्ष चन्देश्वर राय, जिल्ला समन्वय समितिका प्रमुख कौशल किशोर सिंह र मानव अधिकार रक्षक सञ्जालका मुकेश मिश्र अतिथिका रूपमा उपस्थित थिए।संस्थाका अध्यक्ष राउतका अनुसार, लक्ष्मी ब्लड कनेक्ट्स स्थापना भएदेखि नै विभिन्न स्थानीय तह, सरकारी निकाय, NGO तथा INGO सँग सहकार्य गर्दै सामाजिक उत्तरदायित्वका गतिविधि सञ्चालन गर्दै आएको छ। उनले आगामी दिनमा पनि निःशुल्क स्वास्थ्य शिविर, सामाजिक बुराइविरुद्ध अभियान र वातावरण संरक्षणजस्ता कार्यक्रमलाई निरन्तरता दिने प्रतिबद्धता जनाए। रक्तदानमा सहभागी सबैप्रति आभार प्रकट गर्दै आयोजकहरूले यस्ता कार्यक्रमहरूले संविधान दिवसलाई मात्र अर्थपूर्ण नबनाई समाजमा स्वास्थ्य सचेतना, मानवीय सेवा र सामाजिक उत्तरदायित्वको उदाहरण प्रस्तुत गरेको बताएका छन्।