लोडसेडिङ सामाजिक सञ्जालको हल्ला मात्रै हो, यथार्थमा छैन: ऊर्जामन्त्री खड्का

७ जेठ, काठमाडौं । 

ऊर्जा, जलस्रोत तथा सिंचाईमन्त्री दीपक खड्काले  लोडसेडिङ सामाजिक सञ्जालको हल्ला मात्रै भएको बताएका छन्। बुधवारको पूर्वाधार विकास समितिको बैठकमा बोल्दै मन्त्री खड्काले बजारमा आएका हल्लाहरु सस्तो लोकप्रियताका आएका बताएका हुन्। उनले मर्मत सम्भारका लागिबाहेक अन्य कुनै पनि बहानामा लोडसेडिङ् नहुने पनि बताए। मन्त्री खड्काले बेला बखत विद्युत विच्छेद हुने अवस्था आज मात्रै नभइ यसअघिको वर्षहरुमा पनि भएको बताए। गत वर्षमा पनि वर्षमा ७ सय घन्टासम्म यसरी विभिन्न पटक विद्युत गएको उनको दाबी थियो।

‘यो हिउँदमा १ हजार ५ मेगावाटसम्म विद्युत आयात गर्‍यौं। आवश्यकताअनुसार ६ सय, सात सय घट्दै आएर यहाँको विद्युत बढ्दै जाने, आयात घट्दै जाने अवस्थामा छ र थियो। अस्तिको दिनसम्म पनि हामी साढे ३ सय मेगावाट विद्युत आयात गरिरहेका थियौँ । तर आजको रेकर्डअनुसार १५० मेगावाट निर्यात गरेका छौं। हामीलाई विद्युत पुगेर, उब्रिएर, निर्यात गरेका छौं। लोडसेङिको हल्ला यो सामाजिक सञ्जालको हल्ला मात्रै हो,’ उनले भने।