जोरपाटीबाट बरामद ९२ लाखको ‘सुन कनेक्सन’ खोज्दै प्रहरी

११ पुस, काठमाडौं । दुई फरक ठाउँबाट मंगलबार राति ९२ लाख रुपैयाँ नगदसहित तीन जनालाई काठमाडौं उपत्यका अपराध अनुसन्धान कार्यालयको टोलीले पक्राउ गर्‍यो ।

अपराध अनुसन्धान कार्यालयको ४ नम्बर पिलरका डीएसपी अनिल घिमिरेको कमान्डमा खटिएको टोलीले ९२ लाख रुपैयाँ नगद सहित तीन जनालाई पक्राउ गरेको थियो । पक्राउ पर्नेमा रसुवा घर भएका जीतबहादुर तामाङ, सिन्धुपाल्चोक घर भएका रवीन धमला र सङ्‍खुवासभा घर भएका सन्तोष खाती पक्राउ परेका थिए । तामाङ र धमलाको साथबाट ७७ लाख र खातीबाट १५ लाख गरी प्रहरीले ९२ लाख रुपैयाँ बरामद गरेको थियो ।

उनीहरू काठमाडौंको लोलाङ र जोरपाटीबाट पक्राउ परेका हुन् । अवैध सुन कारोबार हुन लागेको भन्ने सूचनाका आधारमा खटिएको प्रहरी टोलीले उनीहरूलाई पक्राउ गरेको हो । यो रकम अवैध सुन खरिद बिक्रीको हुनसक्ने देखिएको अपराध अनुसन्धान कार्यालयका एसएसपी सानुराम भट्टराई बताउँछन् । ‘अवैध सुन खरिद बिक्रीको रकम भएको आशंकामा अनुसन्धान गरिरहेका छौं । प्रारम्भिक अनुसन्धानमा यसको नेक्सस सुनसँग देखिन्छ,’ एसएसपी भट्टराईले भने । पक्राउ परेका मध्ये धमलाको जोरपाटी र रसुवामा सुन पसल रहेको समेत खुलेको छ ।