प्रहरीको प्रवेशसँगै मध्यरातमा पशुपति कोटिहोममा तनाव
सारांश
- पशुपतिनाथ मन्दिर परिसरमा गएराति तनाब उत्पन्न भएको छ ।
- कोटिहोम आयोजक विजयकृष्ण मूर्ति (विजय भण्डारी)लाई पक्राउ गर्न खोजिएको भन्दै पशुपतिमा राति तनाब उत्पन्न भएको हो ।
- प्रहरीले पक्राउ गर्न खोजेको भन्दै विजयकृष्णले फेसबुकमा लाइभ गरेका थिए ।
१ भदौ, काठमाडौँ । पशुपतिनाथ मन्दिर परिसरमा गएराति तनाब उत्पन्न भएको छ ।
कोटिहोम आयोजक विजयकृष्ण मूर्ति (विजय भण्डारी)लाई पक्राउ गर्न खोजिएको भन्दै पशुपतिमा राति तनाब उत्पन्न भएको हो । प्रहरीले पक्राउ गर्न खोजेको भन्दै विजयकृष्णले फेसबुकमा लाइभ गरेका थिए । आफूलाई पक्राउ गर्न गौशाला वृत्तबाट प्रहरी आएको उनले भिडियोमा दाबी गरेका छन् । उनले भड्काउ अभिव्यक्तिसमेत दिएका छन् । लगत्तै उनका समर्थक र सहयोगीले प्रहरी र सरकारविरुद्ध नाराबाजी गरेको लाइभ भिडियोमा देखिन्छ । उनीहरूले प्रहरीलाई तथानाम गालीगलाैज गरेका थिए । विजयकृष्णविरूद्ध ठगीकाे अभियाेग छ । तर, गौशाला प्रहरीले भने त्यस्तो ठूलो तनाब नभएको बताएको छ । महानगरीय प्रहरी वृत्त गौशालाका इन्स्पेक्टर शेखरकुमार शाहले गलत बुझाइका कारण सामान्य होहल्ला भएको बताए । ‘त्यस्तो ठूलो तनाब केही भएको होइन । मिस अन्डरस्ट्यान्डिङले सामान्य विवाद भएको हो,’ उनले भने ।
साउन १ गतेबाट शुरू भएको कोटिहोम शुक्रबार सकिएको हो । यसैबीच, भण्डारीको समूहले पत्रकार श्याम सुन्दर पुडासैनीमाथि हातपात गरेको छ । शुक्रबार मध्यरात पशुपतिमा भएको तनावको विषयमा रिपोर्टिङमा पुगेका उनीमाथि विजय भण्डारीको समूहले हातपात गरेको हो । पुडासैनीले आफूमाथि अराजक समूहले निगरानी गरिरहेको र त्यहाँको अवस्थाबारे फेसबुकमा लेख्नेबित्तिकै घेराबन्दीमा पारेर मञ्चमा उकालेको बताए ।
प्रतिक्रिया