मधेश प्रदेशमा त्रुटीपूर्ण बजेट कार्यान्वयन हुन नसक्ने विपक्षी दलको दाबी

२१ असार, जनकपुर ।

मधेश प्रदेश सरकारले ल्याएको आर्थिक वर्ष २०८३÷०८४ को बजेटम व्यापक त्रुटी रहेको भन्दै कार्यान्वयन हुन नसक्ने विपक्षी दलले आरोप लगाएका छन् ।  आइतबार जनकपुरधाममा पत्रकारसम्मेलन गर्दै विपक्षी दल (जनता समाजवादी पार्टी, नेपाल र जनमत पार्टी)ले मुख्यमन्त्री कृष्ण प्रसाद यादवमाथि आरोपै आरोप लगाए ।

नीति तथा कार्यक्रममा सरकारले प्रस्तुत गरेको एजेण्डा विपरित सरकारले कमिसनमुखी बजेट ल्याएको भन्दै प्रतिपक्षी दलहरुले त्यसमा सुधार नगरे संसदमा बजेट टेबल गर्न नदिने चेतावनी दिएका छन । पत्रकार सम्मेलनमा जसपा नेपालका सांसद उपेन्द्र महतोले मुख्यमन्त्री यादवले आफनै पालिकामा नियम विपरित करोडौं रकमको विभिन्न साना योजनाहरु राखेर अन्य प्रदेशको वेवास्ता गरेको आरोप लगाए ।  विशेष अनुदानको नाममा १३६ वटै पालिकामा एकै प्रकारको योजना राखेर व्यापक भ्रष्टाचारको नियतले सेटिङ्गको आधारमा ल्याइएको महतोले दावी गरे । मधेश प्रदेश सरकारले ल्याएको बजेट अव्यवहारिक, असन्तुलित, निराशाजनक, दिशाहीन, भ्रष्टाचारी पाल्ने प्रकारको रहेको महतोको भनाई छ ।

असार महिनामा मात्रै रौतहट पूर्वाधार कार्यालयले अर्बौ रुपैयाँको बोलपत्र आह्वान र स्विकृत गरेकाले मुख्यमन्त्री यादवको क्षेत्रमा मात्र अर्बौंको योजना राखेर संघीयताको बदनाम गर्ने प्रयास भएको सांसद महतोले बताए । मुख्यमन्त्री यादवले रौटहटस्थित आफ्नो घर भएको पालिकामा करोडौंको अनावश्यक योजनाहरु राखेकोमा विपक्षी दलले असन्तुष्टि व्यक्त गरेका छन् । बजेट पुनर्लेखन नभएसम्म आफूहरु प्रदेश सभाको बैठकमा अवरोध गर्ने र बजेट पास हुन नदिने विपक्षी दलले चेतावनी दिएका छन् । उनीहरुले प्रदेश र प्रदेशवासीको हक हितका लागि समर्पित बजेट ल्याउनुपर्ने र अहिलेको बजेट खारेज गर्नुपर्ने अडान लिएका छन् ।