वडा अधिवेशन सारेर तोकिएको मितिमा महाधिवेशन गर्न गगनको प्रस्ताव

९ पुष, काठमाडौं ‌।

नेपाली कांग्रेसका महामन्त्री गगन थापाले महाधिवेशन कार्यतालिकामा रहेको वडा अधिवेशन पुस १६ गतेबाट २१ गतेमा सारी तोकिएकै मितिमा महाधिवेशन गर्ने प्रस्ताव गरेका छन् । कार्यसम्पादन समितिको बुधबारको बैठकमा महामन्त्री थापाले २१ गते वडा अधिवेशन, २३ गते प्रतिनिधिसभा निर्वाचन क्षेत्रीय अधिवेशन गरी पुष २६ मै केन्द्रीय महाधिवेशन गर्न प्रस्ताव गरेका हुन् । “अहिलेसम्म महाधिवेशनका लागि हुनुपर्ने कामहरू गरिएका छैनन् ।पार्टीको विधान संशोधनका लागि मस्यौदा संशोधन समितिसमेत गठन भएको छैन,” थापाले भने, “हामी नेतृत्व परिवर्तन नगरी चुनावमा जान सक्दैनौँ ।

अब हाम्रो महाधिवेशन हाम्रो मात्रै होइन आम नागरिकको सरोकारको विषय बनिसकेको छ । त्यसकारण तीन तहका महाधिवेशन गरेर नेतृत्व परिवर्तन गर्न सकिन्छ ।” उनले विगतमा पनि थुप्रै जिल्लामा केन्द्रीय महाधिवेशनपछि जिल्ला अधिवेशन भएको भन्दै अहिले पनि पालिका अधिवेशन, प्रदेशसभा, क्षेत्रीय अधिवेशन, जिल्ला अधिवेशन र सात प्रदेशको अधिवेशन निर्वाचनभन्दा पछि गर्न सकिने बताए । आफूले प्रस्ताव गरेको विकल्प प्रस्ताव अमान्य भए विशेष महाधिवेशन कसैले रोक्न नसक्ने उनको भनाइ छ । “तीन तहको महाधिवेशन गरेर नेतृत्व परिवर्तनसहित निर्वाचनमा जान सहमत भए मैले विकल्प प्रस्ताव गरेको छु,” थापाले भने, “नत्र विशेष महाधिवेशनको प्रस्ताव विधानतः दर्ता छ । विशेष महाधिवेशन कसैले रोक्न सक्दैन ।”