सर्लाही, ०५ पुष।

तराई–मधेसमा हिजोदेखि चिसो ह्वात्तै बढेपछि जनजीवन प्रभावित भएको छ। बिहानैदेखि घाम नलागी चिसो हावा चलेको कारण मानिसहरू घरबाहिर कमै मात्र देखिएका छन्।

मलंगवाका बजार र मुख्य मार्गहरूमा सामान्यतया हुने चहलपहल घटेको छ। सधैंजसो भीड हुने जिल्ला अदालत, प्रशासन कार्यालयलगायतका सार्वजनिक सेवा केन्द्रमा सेवाग्राहीको संख्या हिजो शुक्रबार न्यून देखियो।

बिहानको चिसो र हल्का हुस्सुका कारण यातायातसमेत प्रभावित भएको छ। जिल्ला ट्राफिक कार्यालयले दुर्घटना नहोस् भनी चालक तथा यात्रुलाई सावधानी अपनाउन आग्रह गरेको छ।

जिल्ला जनस्वास्थ्य कार्यालयले चिसोका कारण स्वास्थ्य जोखिम बढ्ने भन्दै बालबालिका र वृद्धवृद्धामाथि विशेष ध्यान दिन स्थानीयलाई सचेत गराएको छ।

मौसम पूर्वानुमान महाशाखाका अनुसार आज बिहान ८ बजे मलंगवाको तापक्रम १३ डिग्री सेल्सियस मापन गरिएको छ। हिजो यही समयमा न्यूनतम तापक्रम ११ डिग्री सेल्सियस थियो।