आईपीएल क्रिकेट : अक्सनका लागि ३५० जनाको नाम सार्वजनिक, परेनन् नेपाली खेलाडी

बीसीसीआईले सार्वजनिक गरेको सूचीमा दक्षिण अफ्रिकाका प्रभावशाली क्रिकेटर क्विन्टन डी काकको नाम पनि समावेश गरिएको छ । अक्सनको सूचीम विकेटकिपर ब्याट्सम्यान डी काकको नाम देखेपछि धेरै क्रिकेटप्रेमी आश्चर्यमा परेका छन् । क्विन्टन डी काकले केही समयअघि मात्र अन्तर्राष्ट्रिय क्रिकेटबाट सन्न्‍यास लिएका थिए । उनले अब फ्रेन्चाइज प्रतियोगिता पनि नखेल्ने अनुमान गरिएको थियो । भारतविरुद्ध विशाखापट्टनममा सम्पन्न तेस्रो एकदिवसीय अन्तर्राष्ट्रिय खेलमा शतक प्रहार गरेपछि डी काकले आईपीएलको अक्सनमा सहभागी हुने निर्णय लिएको दाबी समाचारमा गरिएको छ ।

आगामी अक्सनका लागि डी काकले आफ्नो आधारभूत मूल्य एक करोड रुपैयाँ तोकेका छन् । अघिल्लो संस्करणको अक्सनमा उनले आफ्नो न्यूनतम् मूल्य दुई करोड भारतीय रुपैयाँ तोकेका थिए । अघिल्लो सिजन उनले कोलकाता नाइट राइडर्सबाट खेलेका थिए । सन् २०२६ को अक्सनका लागि घोषित सूचीमा ३५ जना नयाँ खेलाडी छन् । श्रीलंकाका त्रिवेन म्याथ्यू, बिनुरा फर्नान्डो, कुसल परेरा र दुनिथ वेलालागे पनि सूचीमा परेका छन् । अफगानिस्तानका अरब गुल र वेस्ट इन्डिजका अकिम अगस्टे पनि सूचीमा छन् । यसका अतिरिक्त, भारतीय खेलाडी सदेक हुसैन, विष्णु सोलङ्की, सागर सोलङ्की, परिक्षीत वलसंगकर र इजाज सावरियाको नाम पनि अप्रत्यासित रुपमा सूचीमा समावेश गरिएको छ । आगामी आईपीएलको अक्सनका लागि केही नेपाली खेलाडीले पनि आफ्नो नाम दर्ता गराएका थिए । तर, नेपाली खेलाडीहरू तीन सय ५० जनाको सूचीमा भने परेका छैनन् । आगामी आईपीएलका लागि डिसेम्बर १६ तारिखमा आबुधाबीमा अक्सन हुँदैछ ।