झापा, मोरङ र सुनसरीबाट लागुऔषधसहित ५ जना पक्राउ
२३ मंसिर, काठमाडौं ।
झापा, मोरङ र सुनसरीका विभिन्न स्थानबाट लागुऔषधसहित ५ जनालाई प्रहरीले पक्राउ गरेको छ । झापाको इलाका प्रहरी कार्यालय कुमरखोदबाट खटिएको प्रहरी टोलीले चेकजाँचका क्रममा भारतबाट नेपालतर्फ पैदल आउँदै गरेका दमक- १ का रोशन भुजेललाई १ ग्राम २९ मिलिग्राम ब्राउन सुगरसहित पक्राउ गरेको हो । यसैगरी मोरङको इलाका प्रहरी कार्यालय पथरीले उर्लाबारी-३ का पंकज पोखरेललाई ६ सय १० मिलिग्राम ब्राउन सुगरसहित पक्राउ गरेको हो ।
यस्तै, चेकजाँचकै क्रममा सुनसरीको अस्थायी प्रहरी पोस्ट तीनकुनेले को १ ह ७७२८ नम्बरको अटो चालक धरान- १५ का लाक्पा दोर्जे तामाङ र अटोमा सवार धरान- ४ की प्रमिला राईलाई प्रतिबन्धित औषधि ट्रामोल ११० क्याप्सुल र स्पास्पेन ११० ट्याब्लेटसहित पक्राउ गरिएको कोशी प्रदेश प्रहरी कार्यालय विराटनगरले जनाएको छ । साथै कारोबारमा लागुऔषध कारोबारमा संलग्न धरान- ८ का ६६ वर्षीय टेकबहादुर तामाङलाई उनकै घर कोठाबाट प्रतिबन्धित औषधि ट्रामोल १०२० क्यापसुल, स्पास्पेन १०१० ट्याब्लेट र नगद १ लाख ४७ हजार ६ सय रुपैयाँसहित नियन्त्रणमा लिएको हो । थप अनुसन्धान भइरहेको प्रहरीले जनाएको छ ।
Post Comment