लालबन्दी नगरपालिका स्वास्थ्य क्षेत्रमा जिल्लाकै उत्कृष्ट

सर्लाही। स्थानीय तह र मातहतका स्वास्थ्य संस्थाहरूबाट सञ्चालन भएका स्वास्थ्य कार्यक्रमहरूको जिल्लास्तरीय वार्षिक समीक्षामा प्रगति मूल्याङ्कन गर्दा जिल्लाका २० स्थानीय तहमध्ये लालबन्दी नगरपालिका पहिलो भएको छ। नगरपालिकाले ९९ अंक प्राप्त गरी जिल्लामै प्रथम स्थान हासिल गरेको हो।

स्वास्थ्य सेवा प्रवाहमा पहिलो स्थान हासिल गर्न सफल लालबन्दी नगरपालिकालाई प्रमुख जिल्ला अधिकारी रामु राज कडरिया र स्वास्थ्य कार्यालय सर्लाहीका प्रमुख डा. नवल किशोर झाले प्रशंसा–पत्रसहित सम्मान गरेका छन्।

लालबन्दी नगरपालिकाले प्रभावकारी स्वास्थ्य सेवा प्रवाह गरी जिल्लामा उत्कृष्ट उपलब्धि हासिल गरेको स्वास्थ्य कार्यालय सर्लाहीले जनाएको छ।

त्यसतै जिल्लाको विष्णु गाउँपालिकाले ९६ दशमलव ७० अङ्कसहित दोस्रो, हरिपुर नगरपालिकाले ९६ दशमलव २० अङ्कसहित तृतीय भएको छ । क्रमशः हरिवन नगरपालिकाले ९५ दशमलव ४० अङ्क, बसबरिया गाउँपालिकाले ९४ दशमलव २० अङ्क, चक्रघट्टा गाउँपालिकाले ८८ दशमलव ९० अङ्क, पर्सा गाउँपालिकाले ८८ दशमलव ६० अङ्क, ईश्वरपुर नगरपालिकाले ८८ दशमलव १० अङ्क, धनकौल गाउँपालिकाले ८८ दशमलव १० अङ्क, बागमती नगरपालिकाले ८४ अङ्क, चन्द्रनगर गाउँपालिकाले ८३ दशमलव ९० अङ्क, बरहथवा नगरपालिकाले ८३ दशमलव ३० अङ्क, ब्रहमपुरी गाउँपालिकाले ८० दशमलव ९० अङ्क, मलंगवा नगरपालिकाले ८० दशमलव ८० अङ्क, गोडैता नगरपालिकाले ७८ दशमलव ३० अङ्क, बलरा नगरपालिकाले ७७ दशमलव ८० अङ्क, कौडेना गाउँपालिकाले ७७ दशमलव ८० अङ्क, हरिपुर्वा नगरपालिकाले ७१ दशमलव ७० अङ्क, कविलासी नगरपालिकाले ७० दशमलव ७० अङ्क र रामनगर गाउँपालिकाले ७० अङ्क अङ्कसहित अन्तिम स्थानमा छ।

जिल्लास्तरीय मूल्याङ्कन समितिले विभिन्न सूचकका आधारमा स्थानीय तहहरूले स्वास्थ्य क्षेत्रमा प्रवाह गरेका सेवाका आधारमा मूल्याङ्कन प्रतिवेदन तयार पारेको स्वास्थ्य कार्यालय सर्लाहीले जनाएको छ।