२० कात्तिक, सर्लाही।

अवैध रूपमा भारत प्रवेश गर्न खोजेको आरोपमा एक नेपाली युवक र एक उजबेकिस्तानी महिला पक्राउ परेका छन्। नेपाल हुँदै सर्लाहीको मलंगवा–सोनबरसा सीमा नाकाबाट प्रवेश गर्न लागेका उनीहरूलाई भारतीय सुरक्षाकर्मीले सोमबार नियन्त्रणमा लिएका थिए। पक्राउ पर्नेमा सर्लाहीको ब्रह्मपुरी गाउँपालिका–२ मोहनपुरका १९ वर्षिय विकेश कुमार महतो र उजबेकिस्तानको समरकन्द बस्दै आएकी ३० वर्षीया सोफिया उज्बेकोभा रहेका छन्।

विकेश दुखा रायका छोरा हुन्। दुवैजनाले नेपालबाट दिल्ली जाने तयारी गरिरहेका थिए। उनीहरूको साथबाट नेपाली र उजबेकिस्तानी सिमकार्डसहित तीन वटा मोबाइल फोन र एउटा इलेक्ट्रिक स्कुटी बरामद गरिएको छ। तर, उनीहरूले कुनै परिचयपत्र वा यात्राको कागजात पेश गर्न सकेनन्। हनुमान चौक चेकपोस्टमा नियमित जाँचका क्रममा उनीहरूले बारम्बार बयान परिवर्तन गरेपछि सुरक्षाकर्मीले शंका गरेर नियन्त्रणमा लिएका थिए।

प्रारम्भिक सोधपुछपछि दुवैजनालाई सोनबरसा प्रहरीले कानुनी प्रक्रिया अघि बढाएको छ। प्रहरीले उनीहरूलाई न्यायिक हिरासतमा पठाउने तयारी गरिरहेको जनाएको छ। भारतमा आजदेखि सुरु भएको विधानसभाको निर्वाचन लक्षित एसएसबीले सीमा क्षेत्रमा निगरानी र तलासी अभियान कडा बनाएको छ।